Azərbaycan, Bakı, 1 sentyabr /Trend/
Brodveydə "Nickelodeon" telekanalının istehsalı olan "Süngər Bob kvadrat şalvar" (SpongeBob SquarePants) animasiya serialının motivləri əsasında müzikl nümayiş olunacaq. Trend-in "The Hollywood Reporter"-ə istinadən verdiyi məlumata əsasən, premyera 2016-cı ilin yayında baş tutacaq.
Tamaşanın bəstəkarlarının Devid Boui, Stiven Tayler, Co Perri, Con Lecend və Sindi Loper olacağı gözlənilir.
Mahnıların yazılmasına ABŞ-ın "Dirty Projectors", "The Flaming Lips", "Lady Antebellum", "Panic! At the Disco" kimi qrupları cəlb olunacaq. Müziklın rejissoru Tina Landau olacaq.
Yaxın zamanda aktyorların seçimi başlayacaq. Seçimlər "Nickelodeon" telekanalının iştirakı ilə keçiriləcək.
Xatırladaq ki, "Süngər Bob kvadrat şalvar" cizgi filmi ilk dəfə 1999-cu il iyulun 17-də efirə çıxıb. Filmdəki hadisələr okeanın dibində Bikini-Bottom şəhərciyində baş verir. Cizgi filminin qəhrəmanları dəniz heyvanlarıdır.