Bakı. Trend:
Tovuzda qeyri-adi təbiət hadisəsi görənləri mat qoyur. Belə ki, burada yetişdirilən alma ağacının bir tərəfi bar verib, digər hissəsi çiçəklənib.
Trend TTV-yə (Region TV) istinadən xəbər verir ki, nadir təbiət hadisəsi Tovuzun Əlimərdanlı kəndində qeydə alınıb. Yay fəslinin ən isti ayı hesab olunan iyulda bu mənzərə çoxlarının marağına və təəccübünə səbəb olub.
Ömrünün yarısından çoxunu əkin-biçinə həsr edən kənd sakini İsmayıl Həsənov deyir ki, ilk dəfədir belə halla rastlaşır: "İlin indiki vaxtında, bu, baş verməyən hadisədir. Bu gün elə bir ağac yoxdur ki, onda çiçək olsun. Bu ağacda var. Eyni zamanda ağacda meyvəni görməyim məni daha da təəccübləndirdi".
Kənd sakinlərinin əksəriyyəti ağacda müşahidə olunan fenomenal prosesi möcüzə adlandırır. Bəziləri isə bunu bitkinin həyat uğrunda mübarizəsi kimi qiymətləndirir.
Alma ilə yanaşı, eyni vaxtda əkilən digər ağaclar da çiçək açıb. Amma onlar bar verməyib. İndi İ.Həsənov ağacın ikinci barını görmək üçün ona xüsusi qulluq edir.
