Azərbaycan, Bakı, 29 aprel /Trend, müxbir İlkin İzzət/
"Beynəlxalq münasibətlərdə ən böyük böhran ədalət böhranıdır. Ədalət yoxdur. İlk Avropa Oyunları ərəfəsində hər gün Azərbaycana qarşı qərəzli münasibət müşahidə edirik. Azərbaycana münasibət, Azərbaycanla bağlı atılan addımlar qərəzlidir".
Trend xəbər verir ki, bunu Azərbaycan Prezident Administrasiyası rəhbərinin müavini, administrasiyanın Xarici əlaqələr şöbəsinin müdiri Novruz Məmmədov bu gün Bakıda keçirilən III Qlobal Açıq Cəmiyyətlər Forumunda "Avropa İttifaqı və onun qonşuluq siyasəti" mövzusuna həsr edilmiş paneldə çıxış edərkən deyib.
Onun sözlərinə görə, bu gün dünyada müharibə ab-havası var: "Biz həm də gərək özümüzdən soruşaq. Nə üçün belə qısa müddətdə belə bir ab-hava özünü göstərir? 20-25 il ərzində beynəlxalq aləmdə beynəlxalq hüququn norma və prinsipləri yox, böyük dövlətlərin iqtisadi, siyasi, geosiyasi maraqlarının ortaya qoyulması belə bir vəziyyətə gətirib çıxardı. Əvvəllər dünyada 10-a yaxın qaynar nöqtə var idi. Bu gün isə 50-yə yaxındır. Bu elə-belə baş vermir".
N.Məmmədov qeyd edib ki, geosiyasi oyunların nəticəsində Azərbaycan torpaqlarının 20 faizi işğal olundu, Dağlıq Qarabağ problemi ortaya çıxdı: "Lakin bu vaxta qədər beynəlxalq hüquqa əsaslanan fikir söylənilmir. Bu məsələ ATƏT-in Minsk Qrupunun monopoliyasına çevrilib. Bilə-bilə ki, Minsk Qrupu bu problemi həll edə bilməz".
PA rəsmisinin fikrincə, vaxtilə Dağlıq Qarabağ münaqişəsi ilə bağlı ədalətli qərar olsa idi, ondan sonrakı münaqişələr də olmazdı:
"Nə Gürcüstanla, nə Moldova, nə də Ukrayna ilə bağlı. Amma beynəlxalq hüquqa belə münasibət elə bir vəziyyətə gətirib çıxarıb ki, bu günlərdə beynəlxalq aləmdə çox böyük gərginlik var və hələlik onun hara aparacağı barədə proqnozlar vermək də mümkün deyil, çox çətindir. Nə üçün belə olmalıdır və nə üçün belə oldu?"
PA rəsmisi bildirib ki, Azərbaycan müsəlman aləminin bir hissəsidir, eyni zamanda Qərb dünyasında nümunəvi, model ola bilən dövlətdir: "Lakin yerləşdiyi geosiyasi mövqedə bu elə də asan iş deyil, amma Azərbaycan rəhbərliyi bunun üçün hər şeyi edir. Bu gün ABŞ-da Baltimorda nələrin baş verdiyi orada vəziyyətin əla olmasından xəbər vermir. Amma biz hər gün, hər an Azərbaycanı təzyiq altında saxlamaq iddiasını görürük. Buna mətbuat, QHT-lər qoşulur, maliyyə dəstəyi ayrılır. Axı nə üçün belə olmalıdır? Azərbaycan bu gün nümunəvi stabillik, təhlükəsizlik və inkişaf nümayiş etdirir".
N.Məmmədov sual edib ki, beynəlxalq aləm, Avropa və Qərb Azərbaycana səmimi və ədalətli mövqe nümayiş etdirirsə, nə üçün Azərbaycanın ərazilərinin 25 ildir işğal altında qalması haqqında bir dəfə olsun beynəlxalq hüququ xatırlada bilən bir fikir söyləmirlər?
"Burada insan haqlarının pozulmasından söhbət gedə bilməz. 1 milyona yaxın azərbaycanlının bütün fundamental hüquqları, yaşamaq hüququ pozulur, amma bir qəzet, bir QHT, bir dövlət nümayəndəsi bir şey demirsə, bu necə ola bilər?" - deyə PA rəsmisi vurğulayıb.
N.Məmmədov qeyd edib ki, bu gün beynəxlalq münasibətlərdə ədalətin olmaması indiki vəziyyətə gətirib: "İndiki vəziyyət nə Qərb və Avropa üçün yaxşıdır, nə də bizim üçün. 21-ci əsrin insan təfəkkürünün, intellektinin bu cür inkişaf etdiyi dövrdə tamam başqa bir situasiya yaranmalı idi. Amma bunun tam əksini görürük".
PA rəsmisi bildirib ki, Azərbycan 2012-ci ildə "Eurovision" mahnı festivalında qalib gəldi: "Bunun ərəfəsində bizə olan hücumların nə dərəcədə olduğunu bilirsinizmi? Biz təəccüblənirik. Bəlkə bu hadisə xatirinə bir az fasilə verərlər? Yox, olmadı. Qədim Yunanıstanda belə bir qayda vardı. Olimpiada olan zaman bütün düşmənçiliklərə fasilə verərdilər, çağırış edərdilər. Əslində, Beynəxlalq Olimpiya Komitəsi müdrik adddım ataraq İlk Avropa Oyunlarının təşkil edilməsini Azərbaycana təklif etdi. Çünki başqa alternativ yox idi. Ancaq bu ərəfədə bizə qarşı elə bir hücum, elə bir kütləvi təzyiq mexanizmi başlayıb ki, biz bunu təsəvvür edə bilmirdik. Bəlkə Avropa Oyunlaının keçirilməsinə imkan verib sonra başlayaydılar? İnanın, bu gün biz bildiklərimizin hamısını sizə desək, siz təəccüblənərsiniz".
N.Məmmədov qeyd edib ki, Azərbaycan dövləti, əhalisi enerji təhlükəsizliyi, terrorizmlə mübarizədə, beynəlxalq əməkdaşlıqda, humanitar əlaqələrin inkişafında - bütün məsələlərdə böyk işlər görüb, töhfələr verib. Azərbaycan Şərqlə Qərb, xristian dünyası ilə islam dünyası, şimalla cənub arasında bir körpüdür. Bu funksiyanı da çox şərəf və uğurla yerinə yetirir. Amma bunu heç kim nəzərə almaq istəmir: "Bu gün Azərbaycan Qərblə, Avropa ilə bütün sahələrdə uğurlu əməkdaşlıq edərək bircə şey istədi - Dağlıq Qarabağ münaqişəsinin həllində kömək etsinlər. Lakin biz bunu görmədik. Başqa sahələrdə bizim ehtiyacımız yoxdur. I Avropa Oyunlarının burada keçirilməsi elə Avropaya bir köməkdir. Amma bizim Qərbə və Avropaya, onun səmimiliyinə olan inamımız tükənir. Bunu bizə sübut etmək lazımdır. Gördüyümüz odur ki, Azərbaycandan bir Liviya, Suriya etmək istəyirlər. Bunu etmək mümkün olmayacaq. Azərbaycan xalqının təfəkkürü, düşüncəsi, həyat təcrübəsi çox yüksəkdir. Nə üçün Dağlıq Qarabağdan əlavə 7 rayon 24 ildir işğal altındadır? Bununla bağlı beynəlxalq təşkilatlar bir söz demir. Nə üçün? Çünki demək olmaz. Yəqin ki, icazə verilmir. Hansı səbəbdən? Gəlin elə dünya quraq, elə istiqamətdə gedək ki, bir-birimizə olan inamımız, etimadımız itməsin".
O, BMT-ni tənqid edərək təşkilatı öz funksiyasını yerinə yetirməməkdə ittiham edib: "Ümumiyyətlə, inamın, etimadın olması, beynəlxalq hüququn norma və prinsiplərinin yerinə yetirilməsi mühüm məsələdir. Bu gün BMT-ni dəyişmək, islahat aparmaq mümkün deyil. Bu proses onilliklərlə gedib. Çünki geosiyasi maraqlar var. Orada hər kəs istəyir özünün hegemonluğunu tətbiq etsin. Ona görə də BMT beynəlxalq universal təşkilat olsa da, bir atributa çevrilib".