Bakı. Trend:
Praqada keçirilən Beynəlxalq Milad Festivalında Azərbaycan stendi təqdim olunub.
Azərbaycanın Çexiyadakı səfirliyindən Trend-ə verilən məlumata görə, Praqa Hilton Hotelində Diplomatların Həyat yoldaşları Assosiasiyası tərəfindən Beynəlxalq Milad Festivalı təşkil edilib.
Sözügedən festival çərçivəsində Çexiyada akreditə olunmuş müxtəlif səfirliklərin stendləri ilə yanaşı, Azərbaycan səfirliyinin stendi quraşdırılıb və ölkəmizə məxsus hədiyyələr, suvenirlər, Azərbaycan şirniyyatı və təamları, içkilər, habelə müxtəlif kitablar xeyriyyə məqsədi ilə satışa çıxarılıb. Festivalda həmçinin Azərbaycan milli rəqsi nümayiş etdirilib.
Satışdan toplanan vəsait Çexiyadakı müxtəlif xeyriyyə təşkilatlarını dəstəkləməyə yönəldilib.
Festival ərzində Azərbaycan stendi tədbir iştirakçılarının marağına səbəb olub və qonaqlara ölkəmizlə bağlı təbliğat materialları paylanılıb.