...

20 Yanvar şəhidlərinin xatirəsi Brüsseldə yad edilib (FOTO)

Siyasət Materials 21 Yanvar 2016 13:58 (UTC +04:00)
20 yanvar 2016-cı il tarixində Azərbaycan-Belçika Dostluq Cəmiyyətinin təşkilatçılığı ilə Brüsselin “Husa President Park” otelinin sərgi salonunda 20 Yanvar şəhidlərinin xatirəsini anmaq üçün “Qara Yanvar Avropalı rəssamların gözü ilə” adlı sərginin açılışı və anım mərasimi təşkil edilmişdir.
20 Yanvar şəhidlərinin xatirəsi Brüsseldə yad edilib (FOTO)

BAKI /Trend/ - 20 yanvar 2016-cı il tarixində Azərbaycan-Belçika Dostluq Cəmiyyətinin təşkilatçılığı ilə Brüsselin "Husa President Park" otelinin sərgi salonunda 20 Yanvar şəhidlərinin xatirəsini anmaq üçün "Qara Yanvar Avropalı rəssamların gözü ilə" adlı sərginin açılışı və anım mərasimi təşkil edilmişdir.

Mərasim 20 yanvar şəhidlərinin xatirəsinin bir dəqiqəlik sükutla yad edilməsi ilə açıq elan edilmişdir. Daha sonra Azərbaycanın dövlət himni səsləndirilmiş və qanlı hadisələrin görüntülərini əks etdirən videomaterial, eyni zamanda belçikalı rəssamlar Stefan de Blok, Maaike Beuten, Kito Sino, Boris Metçinski və əslən azərbaycanlı Əli Seyran İmanzadənin faciəyə həsr olunmuş rəsm əsərləri nümayiş etdirilmişdir.

Tədbirdə çıxış edən Azərbaycan-Belçika Dostluq Cəmiyyətinin rəhbəri Ayxan Dəmirçi 20 Yanvar şəhidlərinin Azərbaycanın müstəqilliyi uğrunda canlarından keçdiklərini vurğulayaraq, bu günün müasir Azərbaycan tarixində dönüş nöqtəsi olduğunu qeyd etmişdir.

Səfir Fuad İsgəndərov və Azərbaycan Respublikasının NATO yanında Nümayəndəliyinin rəhbəri Xəzər İbrahim mərasimdə çıxış edərək, 1990-cı il yanvarın 19-dan 20-ə keçən gecə Sovet Ordusunun Bakıda törətdiyi qanlı hadisələr, bu hadisənin Azərbaycan tarixində yeri və nəticələri barədə geniş məlumat vermişlər. Natiqlər sovet ordusunun törətdiyi bu qanlı cinayətin keçmiş SSRİ-nin süqutunu daha da sürətləndirdiyi, Azərbaycanda müstəqillik hərəkatının daha geniş vüsət almasına şərait yaratdığını qeyd etmiş, doğma vətənin hazırki inkişaf mərhələsində o günlərin tarixi təcrübəsinin nəzərə alınmasının xüsusi əhəmiyyət kəsb etdiyini vurğulamışlar.

Mərasim Brüssel Kral Konservatoriyasının musiqiçiləri, skripkaçı Daniel Bartos və pianoçu Guilio Cilona'nın ifasında səslənən kədərli Azərbaycan musiqisi sədaları altında davam etmişdir.

Mərasimdə Belçikada yaşayan Azərbaycan və türk icmasının təmsilçiləri, KİV nümayəndələri, azərbaycanlı tələbələr, Səfirlik və NATO yanında nümayəndəliyimizin əməkdaşları və ailə üzvləri iştirak etmişlər.

Məqalədə:
Xəbər lenti

Xəbər lenti