Bakı. Azad Həsənli - Trend:
Dünya enerji bazarında dəyişkənlik fonunda "Cənub Qaz Dəhlizi" layihəsinin vaxtında reallaşdırılması həlledici əhəmiyyətə malikdir.
Trend-in məlumatına görə, bunu Avropa Komissiyasının enerji birliyi üzrə vitse-prezidenti Maroş Şefçoviç "Cənub Qaz Dəhlizi" Məşvərət Şurası çərçivəsində nazirlərin ikinci toplantısının yekunları üzrə mətbuat konfransında deyib.
Onun sözlərinə görə, istənilən yubanmalar yersiz xərclərə səbəb olacaq: "Hamı Xəzər qazının Türkiyəyə 2018-ci ilə, Aİ-yə isə 2020-ci ilə tədarükünə başlanılacağını gözləyir".
İtaliyada Transadriatik (TAP) boru kəmərinin Apuliya bölgəsi ərazisi ilə çəkilməsi barədə etirazlara gəlincə, o, İtaliya hökumətinin bu işlər üzrə yerli hakimiyyətlə müzakirələr aparmasının vacibliyini qeyd edib: "Biz ümid edirik ki, bu məsələ qrafikə və bu layihənin ilkin konsepsiyasına təsir etmədən həll ediləcək".