...

İtaliya Prezidenti cəbhədəki vəziyyətlə bağlı məlumatlandırılıb

Siyasət Materials 6 Aprel 2016 12:35 (UTC +04:00)
İtaliya Prezidenti Sercio Mattarella cəbhədəki vəziyyətlə bağlı məlumatlandırılıb.
İtaliya Prezidenti cəbhədəki vəziyyətlə bağlı məlumatlandırılıb

Bakı. Trend:

İtaliya Prezidenti Sercio Mattarella cəbhədəki vəziyyətlə bağlı məlumatlandırılıb.

Bu barədə Trend-ə Azərbaycan XİN-dən məlumat verilib.

Bildirilir ki, cari ilin aprelin 4-də Azərbaycanın İtaliyadakı fövqəladə və səlahiyyətli səfiri Məmməd Əhmədzadə etimadnaməsini İtaliya Prezidenti Sercio Mattarellaya təqdim etmək üçün onun tərəfindən qəbul edilib. Etimadnamənin təqdim edilməsindən sonra İtaliya Prezidenti Azərbaycan səfiri ilə söhbət edib.

M.Əhmədzadə ilk öncə Azərbaycan Prezidenti İlham Əliyevin İtaliya Prezidentinə salamlarını və xoş arzularını çatdırıb. Prezident S.Mattarella da öz növbəsində, azərbaycanlı həmkarına onun salamlarını və xoş arzularını çatdırmağı xahiş edib, Prezident İlham Əliyevin ötən il İtalyaya səfəri çərçivəsində onunla keçirdiyi görüşü məmnuniyyətlə xatırladığını deyib.

Görüşdə Azərbaycan Prezidentinin 2014-cü ildə İtaliyaya rəsmi səfəri vaxtı iki ölkənin hökumətləri arasında qəbul olunmuş "Strateji tərəfdaşlıq haqqında bəyannamə"də əks olunduğu kimi Azərbaycan və İtaliya arasında strateji əməkdaşlıq, həyata keçirilmiş yüksək səviyyəli səfərlər, bütün sahələrdə, o cümlədən, iqtisadi, enerji, qeyri-neft sektorlarında əməkdaşlıq, ölkəmizin müxtəlif sektorlarında italyan şirkətlərinin fəaliyyəti, Cənub Qaz Dəhlizi və TAP layihəsi barədə danışılıb.

Azərbaycanın Qərb-Şərq, Şimal-Cənub nəqliyyat dəhlizlərinin inkişafına verdiyi töhfələr, bu xüsusda həyata keçirilən layihələr barədə danışan Azərbaycan diplomatı ölkəmizin İtaliya şirkətləri üçün ətraf bazarlara çıxmaq istiqamətində önəmli qapı olduğunu da deyib.

M.Əhmədzadə Azərbaycanın multikulturalizm modeli, mədəniyyətlərarası dialoqa verdiyi töhfələr, BMT-nin Sivilizasiyalararası Alyansın 7-ci Qlobal Forumun Bakıda keçiriləcəyi, iki ölkə arasında mədəniyyət və humanitar sahələrdə əməkdaşlıq barədə danışıb, Azərbaycan mədəniyyətinin İtaliyada təbliği, İtaliyanın tarixi-mədəni irsinin qorunması üçün Azərbaycanın Birinci xanımı Mehriban Əliyevanın rəhbərlik etdiyi Heydar Əliyev Fondu tərəfindən həyata keçirilmiş tədbir və layihələrdən, habelə Expo Milan və Venesiya Biennallesi kimi dünya əhəmiyyətli tərdbirlərdə ölkəmizin uğurlu iştirakından bəhs edib.

İtaliya Prezidenti ölkələrimiz arasında mədəniyyət və humanitar sahələrdə əməkdaşlıqdan məmnunluğunu bildirib, bu xüsusda Azərbaycanın birinci xanımı Mehriban Əliyevanın səylərini yüksək qiymətləndirib.

Görüşdə, habelə Azərbaycan və Ermənistan qoşunlarının təmas xəttində Ermənistan tərəfinin təxribatı nəticəsində yaranmış son vəziyyət barədə də fikir mübadiləsi aparılıb.

Azərbaycan diplomatı mövcud vəziyyət, həmçinin münaqişə ilə əlaqədar ətraflı məlumat verib, münaqişənin tezliklə həlli üçün beynəlxalq ictimaiyyətin Ermənistana təzyiq etməsinin vacibliyini demiş, bu xüsusda İtaliya tərəfinin Ermənistanın hərəkətlərini pisləməsinin və Ermənistandan BMT qətnamələrinə əməl etməyi və öz qoşunlarını Azərbaycan ərazilərindən çıxarmağı tələb etməsinin əhəmiyyətli olacağını bildirib.

İtaliya Prezidenti mövcud vəziyyətlə bağlı ölkəsinin narahatlığını ifadə etmiş, münaqişənin tezliklə sülh yolu ilə həllinin vacibliyini demişdir.

Məqalədə:
Xəbər lenti

Xəbər lenti