...

Əli Əhmədov Yevlax və Mingəçevirdə icbari tibbi sığortanın tətbiqi ilə maraqlanıb (FOTO)

Siyasət Materials 17 Yanvar 2017 17:40 (UTC +04:00)
Baş nazirin müavini Əli Əhmədov Yevlax rayonuna və Mingəçevir şəhərinə səfər edib.
Əli Əhmədov Yevlax və Mingəçevirdə icbari tibbi sığortanın tətbiqi ilə maraqlanıb (FOTO)

Bakı. Trend:

Bu gün Baş nazirin müavini Əli Əhmədov icbari tibbi sığortanın tətbiqi ilə bağlı Yevlax rayonuna və Mingəçevir şəhərinə səfər edib.

Nazirlər Kabineti yanında İcbari Tibbi Sığorta üzrə Dövlət Agentliyinin İctimaiyyətlə əlaqələr sektorundan Trend-ə verilən məlumata görə, Ə.Əhmədov Yevlax Rayon Mərkəzi Xəstəxanasının və Mingəçevir Şəhər Mərkəzi Xəstəxanasının mövcud infrastrukturu, həmçinin İcbari Tibbi Sığorta üzrə Dövlət Agentliyi tərəfindən yeni alınan tibbi avadanlıqlar ilə tanış olub, Yevlax Rayon Mərkəzi Xəstəxanasının və Mingəçevir Şəhər Mərkəzi Xəstəxanasının tibb personalı ilə görüşüb.

Ə.Əhmədov bildirib ki, Yevlax və Mingəçevirin pilot ərazilər olaraq seçilməsi təsadüfi deyil: "Belə ki, hər iki ərazidə Prezidentin tapşırığına əsasən, həyata keçirilən tədbirlər nəticəsində səhiyyə infrastrukturu xeyli dərəcədə yaxşılaşdırılıb, yeni xəstəxanalar tikilib, lazımi infrastruktur işləri həyata keçirilib. İndi isə qarşımızda duran məqsəd icbari tibbi sığortanın tətbiq olunmasıdır".

Baş nazirin müavini deyib ki, Yevlax və Mingəçevirdə icbari tibbi sığortanın tətbiqinə dair pilot layihələrin həyata keçirilməsi üçün lazımi şərait yaradılıb, müvafiq qurumlar qarşısında konkret vəzifələr müəyyənləşdirilib.

Ə.Əhmədov qeyd edib ki, bütün dünyada səhiyyə sistemi icbari tibbi sığorta əsasında maliyyələşdirilir: "Bu, səhiyyənin maliyyələşməsinin yeni, müasir formasıdır. Bunu həyata keçirməkdə məqsəd əhalinin tibbi xidmətlərə əlçatanlığını təmin etmək və tibbi xidmətlərin keyfiyyətini yaxşılaşdırmaqdır".

Baş nazir müavini dövlətin səhiyyəyə ayırdığı vəsaitlərdən səmərəli istifadə edilməsində icbari tibbi sığortanın əhəmiyyətini vurğulayaraq, dövlət tərəfindən səhiyyənin maliyyələşməsi üçün əhəmiyyətli vəsait ayrıldığını, səhiyyənin maliyyələşməsinin yeni formasını tətbiq etməklə bu vəsaitlərin daha səmərəli istifadə olunmasının və ayrılan vəsaitlə vətəndaşlara daha yüksək səhiyyə xidmətlərinin göstərilməsinin əsas hədəflərdən biri olduğunu bildirib.

Tədbirlərdə Agentliyin direktoru Zaur Əliyevin 2017-ci ildə pilot ərazilərdə görüləcək işlər barədə məlumatları dinlənilib, Agentliyin direktoru bu qurumun tabeliyinə verilən tibb müəssisələrinin maliyyələşdirilməsi, inventarizasiyası və kadr məsələlərinin tənzimlənməsinin həyata keçirilməsi, sözügedən ərazilərin tibb müəssisələri şəbəkəsinin və mövcud resurslarının optimallaşdırılması, əhalinin icbari tibbi sığorta ilə əhatə olunması, tibb müəssisələrinin idarəçiliyinin icbari tibbi sığortanın tələblərinə uyğunlaşdırılması istiqamətində qarşıda duran vəzifələr ətrafında fikir mübadiləsi aparılıb.

Ə.Əhmədov pilot layihənin tətbiqinin uğurla həyata keçirilməsi üçün bütün lazımi addımların atılacağını qeyd edib, yerli icra orqanlarına və digər aidiyyatı qurumlara bu işlərə dəstəyinin artırılması ilə bağlı müvafiq tapşırıq və tövsiyələrini bildirib.

Məqalədə:
Xəbər lenti

Xəbər lenti