"Bir nəfər gəncin səhvi üzündən AXCP-ni iqtidar-müxalifət partiyaları arasındakı danışıqlardan kənarlaşdırmaq doğru deyil". Bu fikirləri Trend ə açıqlamasında sabiq AMİP sədri Etibar Məmmədov bildirib.
O qeyd edib ki, bir nəfər partiya üzvünün yol verdiyi hərəkətə görə iqtidar-müxalifət danışıqlarını dayandırmaq və müxalifətin fəal qüvvələrindən olan Azərbaycan Xalq Cəbhəsi Partiyasını (AXCP) proseslərdən təcrid etmək olmaz. E.Məmmədovun fikrincə, bu partiya danışıqlarda mütləq iştirak etməlidir.
"AXCP əleyhinə kampaniya aparmağa ehtiyac yoxdur. Ümumi şəkildə də hamını günahlandırmaq olmaz. Ruslan Bəşirlinin yol verdiyi hərəkət çox pisdir və onun heç bir bəraəti yoxdur.
Amma eyni zamanda bu hadisədən istifadə edib siyasi kampaniya aparmaq, başqalarına böhtan atmaq düzgün deyil"-deyə E.Məmmədov vurğulayıb.
İqtidarla müxalifət arasında danışıqların davam etdirilməsinə gəldikdə isə E.Məmmədov bildirib ki, bu görüşlərdə konkret mövzuların və səlahiyyətlərin müəyyən olunmamasına baxmayaraq, dialoqun ümumiyyətlə baş tutmamasından bu görüşlərin keçirilməsi daha yaxşıdır.