"Müxalifət seçkiöncəsi narıncı çadr qurmaqla beynəlxalq təşkilatların diqqətini özünə çəkməsi seçki təbliğatı üçün qəbuledilməyən variantıdır" Bu barədə Trend agentliyinə hakim Yeni Azərbaycan Partiyasının (YAP) icra katibi Əli Əhmədov bildirib.
YAP-ın icra katibi onu da vurğulayıb ki, iqtidar çadır düşərgələrini ləğv edib yerində uca binalar inşa etdirdiyi, əhalinin sosial rifahının yaxşılaşması istiqamətində müxtəlif proqramlar həyata keçirdiyi bir vaxtda müxalifət özünə çadır qurub.
"Çadır dövrü artıq çoxdan keçib" - deyən Ə.Əhmədov müxalifətin əvvəlcədən düşünülmüş bu "şou"sunu cəmiyyət tərəfindən qəbul edilmədiyini bildirib: "Təbliğat əməli işlə aparılmalıdır, çadırlarda aparılmamalıdır".
"Seçki Məcəlləsinin siyasi fəaliyyət proqramında çadır qurmaqla təbliğat aparmaq variantları göstərilməyib". Bunu isə Trend ə YAP icra katibinin müavini, millət vəkili Səyavuş Novruzov söyləyib.
S.Novruzovun fikrincə, müxalifət özünə narıncı rəngdə çadır qurmaqla hansısa xarici dairələrdən növbəti dividentini qazanmağa çalışır. O, çadırların ləğv edildiyi bir dönəmdə müxalifətin belə variantdan istifadə etməsini hələ köhnə fikirlərində qalması ilə bağlayıb.
Qeyd edək ki, narıncı rəngdə çadır müxalifətyönlü Azərbaycan Demokrat Partiyasının (ADP) Ali Məclisinin üzvü Qurban Məmmədov tərəfindən seçki qərargahı kimi qurulub.