Azərbaycanın Latviya və Almaniyadakı səfirləri bu ölkələrin prezidentlərinə öz etimadnamələrini təqdim ediblər. Azərbaycan Xarici İşlər Nazirliyinin mətbuat mərkəzindən Trend ə bildiriblər ki, Azərbaycanın Latviyadakı səfiri Tofiq Zülfüqarov Latviya Respublikasının prezidenti xanım Vayre Vike-Freyberqə etimadnaməni təqdim edib və iki ölkə arasında əlaqələrin inkişafı üçün ciddi səy göstərəcəyini bildirib.
Görüşdə bu il oktyabrın 3-4-də Latviya prezidentinin Azərbaycana səfəri ilə bağlı hazırlıq məsələlri barədə fikir mübadiləsi aparılıb. Latviya prezidenti səfirliyin məhz Latviyada açılması ilə bağlı qərarını yüksək qiymətləndirib və bizim ölkəyə səfərini və dövlət başçısı ilə görüşlərini səbirsizliklə gözlədiyini, bu səfərin ikitərəfli əlaqələrin inkişafına yeni təkan verəcəyini qeyd edib.
Azərbaycan-Almaniya arasında ikitərəfli əlaqələrin perspektivləri, iki ölkə arasında mövcud siyasi münasibətlər, Azərbaycanda demokratik islahatlar, Dağlıq Qarabağ münaqişəsi, Cənubi Qafqazda və bütövlükdə Xəzər regionundakı vəziyyət Azərbaycanın Almaniyadakı səfiri Pərviz Şahbazovun öz etimadnaməsini prezident Horst Kelerətəqdimatı mərasimi zamanı müzakirə olunub.
Tərflər həmçinin, iki ölkə arasında iqtisadi əməkdaşlıq məsələlərini də müzakirə ediblər.