"Müxalifət xalqın ona göstərə biləcəyi etimadı qazanmaq şansından məhrum olduğundan hakim Yeni Azərbaycan Partiyasına (YAP) böhtan atır". Bu barədə Trend ə YAP-ın partiyalararası əlaqələr bölməsinin rəhbəri, millət vəkili Səyyad Aran bildirib.
S.Aran bunu müxalifətin guya YAP-ın dairə seçki məntəqələrində seçicilərin otuz faizinə seçki vəsiqəsi verməməsi və bununla da seçkiləri saxtalaşdıracağı ilə bağlı ittihamlarına cavab olaraq bildirib: "Hakim partiya belə bir prosesi həyata keçirməkdən uzaqdır. Buna ehtiyac da yoxdur. Xalqın YAP-ın liderinə olan etimadı seçkilərdə hansı qüvvəyə daha çox səs veriləcəyini indidən müəyyənləşdirib".
Millət vəkili onu da qeyd edib ki, "Azadlıq" bloku tərəfindən belə ittihamların irəli sürülməsində məqsəd YAP-ı ictimaiyyətin gözündən salmaq məqsədi daşıyır: "Xalq seçimini çoxdan edib. Özünü müxalifətin liderləri hesab edənlərə xalq etimad göstərsəydi, onlar da lazımi ünvanlarda təmsil olunardılar. Seçki öncəsi belə ittiham və böhtanlarla çıxış etmək bizim müxalifətin köhnə adətidir".