Noyabrın 3-də Azərbaycan respublikasının müdafiə naziri, general-polkovnik Səfər Əbiyev Bəhreyn Krallığının Azərbaycanda qeyri-rəsmi səfərdə olan Müdafiə naziri general-leytenant Şeyx Xəlifə Bin Əhməd Əl Xəlifəni və nümayəndə heyətini qəbul edib. Bu barədə Trend ə Müdafiə Nazirliyinin mətbuat xidmətindən məlumat verilib.
Nazir əvvəlcə qonaqları Ramazan bayramı münasibətilə təbrik edərək bildirib ki, Azərbaycan ərəb ölkələri ilə hərbi əməkdaşlığı daim genişləndirməkdə maraqlıdır. O, Ermənistan-Azərbaycan müunaqişəsi, bu münaqişənin həlli istiqamətində hazırkı vəziyyəti, Azərbaycanan geostrateji mövqeyi və iqtisadi inkişafı haqqında qonaqlara məlumat verib. "Azərbaycanan iqtisadiyyatı ildən-ilə güclənir. Bu isə onun Silahlı Qüvvələrinin güclənməsi deməkdir. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev bu məsələyə xüsusi diqqət yetirir və qayğı göstərir", - deyə Səfər Əbiyev söyləyib.
Şeyx Xəlifə Bin Əhməd Əl Xəlifə səmimi qəbula görə Səfər Əbiyevə təşəkkürünü bildirib və Azərbaycanın öz torpaqlarını azad edəcəyinə inandığını söyləyib. : "Çünki haqq Azərbaycanın tərəfindədir. Bəhreyn Krallığı Azərbaycana bütün sahələrdə yardım etməyə hazırdır. Mən Bəhreyn-Azərbaycan hərbi əməkdaşlığının yaradılmasında əlimdən gələn köməyi edəcəyəm", deyə qonaq bildirib.
Görüşün sonunda Şeyx Xəlifə Bin Əhməd Əl Xəlifə müdafiə naziri Səfər Əbiyevi Bəhreynə səfərə dəvət edib.