Dekabrın 2-də "Elmar Hüseynov fondu"nun toplantısı keçirilib. Trend məlumat verir ki, toplantıda fondun təsisçiləri və kütləvi infomrasiya vasitələrinin nümayəndələri iştirak edib.
"Qanun" jurnalının baş redaktoru Şahbaz Xuduoğlu bildirib ki, "Monitor" jurnalının baş redaktoru mərhum Elmar Hüseynovun ölümündən 9 ay ötməsinə baxmayaraq, cinayətin üstü hələ də açılmayıb. Ş.Xuduoğlu Azərbaycan Respublikası Milli Təhlükəsizlik Nazirliyində aparılan istintaqın ötən 9 ay ərzində hər hansı yeni fakt ortaya çıxara bilməməsindən və cinayətkarların hələ də azadlıqda olmasından narahatlığını bildirib.
"Yeni Müsavat" qəzetinin baş redaktoru Rauf Arifoğlu Redaktorlar Şurasının toplantılarını bərpa etməyi təklif edib. "Elmarın ölümü Redaktorlar Şurasının toplantısında hər dəfə müzakirəyə çıxarılmalı, qabardılmalıdır və müvafiq qərarlar qəbul edilməlidir. Bununla da Elmarın ölümünü gündəmdə saxlamaq lazımdır", - deyə R.Arifoğlu qeyd edib.
"Gün səhər" qəzetinin baş redaktoru Arif Əliyev isə təklif edib ki, "Elmar Hüseynov fondu"nun yeni fəaliyyət proqramı hazırlansın. Qərara alınıb ki, bu proqramın hazırlanması üçün yaxın günlərdə işçi qrupu yaradılsın.
Tədbirin sonunda fondun təsisəiləri toplantı iştirakçıları Azərbaycan Respublikasının Prezidenti İlham Əliyevə və milli təhğükəsizlik naziri Eldar Mahmudova müraciət qəbul ediblər. Müraciətlərdə ölkə başçısından fondun təsisçilərini qəbul etməsi, milli təhlükəsizlik nazirindən isə E.Hüseynovun ölümü ilə bağlı istintaqın işinin sürətləndirilməsi xahiş olunub.