Yanvarın 17-də Azərbaycanın ekologiya və təbii sərvətlər nazirliyində Dünya bankı (DB) və Azərbaycan hökuməti arasında yeni "Azərbaycanın kənd ətraf mühiti" layihəsinin icrasına yardım ilə bağlı kredit və 2 qrant sazişi imzalanıb. Trend bildirir ki, bu barədə ekologiya və təbii sərvətlər nazirliyinin yanvarın 17-də yaydığı məlumatda deyilir.
Sənədi DB tərəfdən bankın Azərbaycan üzrə ölkə menecerinin əvəzi Səidə Bağırlı və ekologiya naziri Hüseyn Bağırov imzalayıb.
Layihənin ümumi dəyəri $17,1 mln. təşkil edir. Bundan $8 mln. Beynəlxalq İnkişaf Assosiasiyasının krediti, $5 mln. Qlobal Ekoloji Fondun və $2,72 mln. Yaponiya hökuməti tərəfindən ayrılmış qrantın payına düşür. Azərbaycanın layihədə iştirak payı $1,38 mln. təşkil edir. Layihə üç əsas komponentdən ibarətdir və layihənin əsas məqsədi iki dağ bölgəsində biomüxtəlifliyin qorunması, təbii sərvətlərin idarə edilməsi, bu ərazilərin ekoloji sağlamlığının və təbii meşələrinin məhsuldarlığının bərpa edilməsidir.