Azərbaycan, Bakı, 13 oktyabr /Trend/
Bakı sakinlərinin əksəriyəti artıq Nizami muzeyinin yaxınlığında yerləşdirilən balaca taxta evlərə diqqət yetirsələr də, həmin evlərin burada olmasının məqsədini hələ bilmirlər. Bəli, siz yanılmadınız, sizi əsl Yeni il sürprizi gözləyir.
Azərbaycanın aparıcı və dəbli "Nərgiz" jurnalı "Soyuq əllər, isti ürək" adlı Yeni il xeyriyyə yarmarkasını təşkil edir.
13-20 dekabr tarixlərində yarmarkaya gələn şəhər sakinləri və qonaqlar bayram ab-havasından həzz alacaq, Jan Atelier, Lilak, Carrousel, Ali&Nino və digər brendlərdən hədiyyələr əldə edə biləcəklər.
Yarmarkanın rəsmi açılışı 14 dekabr saat 19:00-da baş tutacaq. "Nərgiz" jurnalının baş redaktoru Ülviyyə Rəhmanova, tədbirə dəvət olunmuş ulduz Miri Yusif və "Beat Heaven" qrupu 3 saylı internatın istedadlı uşaqları ilə birgə təntənəli gecəni açıq elan edəcəklər. Burada internatdə tərbiyə alan uşaqların əl işləri satışa çıxarılacaq. Suvenirlərin əldə olunması və ləziz yeməklərdən başqa, burada sizi Azərbaycanın tanınmış yazıçılarının avtoqraf-sessiyası, uşaqlar və böyüklər üçün müxtəlif əyləncələr və əlbəttə ki, Şaxta baba ilə Qar qız gözləyəcək.
Hər gün saat 12:00-dan qonaqlar Yeni il hitlərindən həzz alacaq, isti şokolad içəcək və "Nərgiz" jurnalının tərəfdaşları tərəfindən təşkil olunan əyləncələrə qoşulacaqlar.
20 dekabr tarixində yarmarkanın təntənəli bağlanışı olacaq. Bağlanış çərçivəsində hər qonaq lotereyada iştirak edib "Nərgiz" jurnalının tərəfdaşları tərəfindən müxtəlif hədiyyələr əldə etmək şansı qazanacaqlar. Bu hədiyyələr arasında tanınmış müğənni Emin Ağalarovun konsertinə iki bilet və əsas priz olaraq Pasha Travel-dən Dubaydakı 5 ulduzlu hotellərin birinə bilet oynanılacaq.
Miroslav Duma Buro 24/7 kimi tanınmış dəbli saytın azərbaycan versiyasının açılışı ərəfəsində sərgiyə təşrif buyuracaq və gecənin xüsusi qonağı olacaq.
İnternat uşaqlarının arzularını həyata keçirmək şansını qaçırmayın. Gəlin, hər birimiz Şaxta baba olaq!
"Soyuq əllər, isti ürək" adlı Yeni il xeyriyyə yarmarkasının baş sponsoru Bank Technique-dir.