...

Heydər Əliyev Mərkəzində "Sabahın alimləri" IV Respublika müsabiqəsinin açılış mərasimi keçirilib (FOTO)

Cəmiyyət Materials 12 Fevral 2015 17:07 (UTC +04:00)
Bu gün Heydər Əliyev Mərkəzi, Təhsil Nazirliyi, Gənclər və İdman Nazirliyi, "Mədəd" Təşkilatının təşkilatçılığı ilə "Sabahın alimləri" IV Respublika müsabiqəsinin açılış mərasimi keçirilib.
Heydər Əliyev Mərkəzində "Sabahın alimləri" IV Respublika müsabiqəsinin açılış mərasimi keçirilib (FOTO)

Azərbaycan, Bakı, 12 fevral /Trend, müxbir İlhamə İsabalayeva/

Bu gün Heydər Əliyev Mərkəzi, Təhsil Nazirliyi, Gənclər və İdman Nazirliyi, "Mədəd" Təşkilatının təşkilatçılığı ilə "Sabahın alimləri" IV Respublika müsabiqəsinin açılış mərasimi keçirilib.

Trend-in məlumatına görə, tədbirdə çıxış edən təhsil naziri Mikayıl Cabbarov bildirib ki, "Sabahın alimləri" IV Respublika müsabiqəsinin Azərbaycan gəncliyinin və təhsilinin inkişafına hər zaman xüsusi diqqət göstərən Heydər Əliyevin adını daşıyan mərkəzdə keçirilməsi təsadüfi deyil: "Ölkədə təhsil islahatlarının həyata keçirilməsi, kadr və intellektual potensialın möhkəmləndirilməsi məhz Heydər Əliyevin adı ilə bağlıdır. Onun miras qoyduğu milli təhsil quruculuğu bu gün Prezident İlham Əliyev və Heydər Əliyev Fondunun prezidenti Mehriban xanım Əliyeva tərəfindən uğurla davam etdirilir".

Elmsiz təhsili, təhsilsiz elmi təsəvvür etməyin mümkün olmadığını deyən M.Cabbarov qeyd edib ki, "Sabahın alimləri" müsabiqəsinin keçirilməsinin əsas məqsədi yuxarı sinif şagirdlərinə elmi təfəkkür tərzi və tədqiqatçılıq vərdişləri aşılamaqdır. Nazir hesab edir ki, innovativ fikir yarışması olan bu müsabiqə gənclərə müxtəlif problemlərin elmi həll yollarını axtarıb tapmağa kömək edəcək.

Onun sözlərinə görə, müsabiqə hər il ABŞ-da 70-dən artıq ölkənin şagirdlərinin iştirakı ilə keçirilən Beynəlxalq Elm və Mühəndislik Sərgisi (Intel ISEF) çərçivəsində təşkil olunur. Müsabiqədə Bakı və Sumqayıt şəhərlərində yerləşən ümumtəhsil məktəblərinin IX-XI sinif şagirdləri iştirak edirlər.

Müsabiqəyə Azərbaycan Texniki Universiteti, Bakı Dövlət Universiteti və Sumqayıt Dövlət Universitetinin elmi dəstək verdiyini xatırladan nazir müsabiqəyə təqdim olunan layihələrin sayının artdığını söyləyib.

M.Cabbarov qeyd edib ki, builki müsabiqədə 204 şagird 106 elmi layihə ilə iştirak edir. Onlardan 39-u fərdi, 67-si kollektiv layihədir. Müsabiqəyə Bakı şəhəri ilə yanaşı, ölkənin müxtəlif bölgələrinin ümumtəhsil məktəblərinin şagirdləri də layihələr təqdim ediblər. Üç gün davam edəcək müsabiqənin qaliblərinə təşkilatçılar tərəfindən diplom, medal və mükafat təqdim olunacaq.

Azərbaycan Milli Elmlər Akademiyasının prezidenti Akif Əlizadə isə bu müsabiqənin elmə getdikcə daha böyük töhfələr verəcəyinə inandığını deyib. Azərbaycan elminin inkişafında gənc alimlərin yerinin göründüyünü deyən AMEA prezidenti xatırladıb ki, bu ilin sonunda AMEA-nın 70 illiyi qeyd ediləcək: "Bu illər ərzində Azərbaycanda beynəlxalq səviyyədə tanınan alimlər yaşayıb və onların öz dəstxəti olub. Әfsuslar olsun ki, bu gün bəzi elmi məktəblərin sayı azalıb, bəzilərinin çərçivəsi darlaşıb. Ancaq bəzi elmi mərkəzlər bu gün də inkişaf etməkdədir. Hazırda elmin əsas problemlərindən biri kadr çatışmazlığı ilə bağlıdır".

Akademiya prezidenti hesab edir ki, gənclərin püxtələşmiş alimlərin yanında olması Azərbaycan elmi üçün böyük impulsdur: "Bu gün Azərbaycan gənclərinə böyük etimad var. Bugünkü gənclər 20, 30, 50 il sonra ölkəni müxtəlif sahələrdə təmsil edəcəklər. Bu gün akademiyada elmlə məşğul olmaq üçün tam şərait yaradılıb. Akademiyanın gözəl mövqeyi, geniş bazası var. Bu gün akademiyanın qapıları gənclərin üzünə açıqdır".

Gənclər və idman nazirinin müavini İntiqam Babayev bildirib ki, şagirdlərin beynəlxalq elm yarışlarında qazandıqları hər bir uğur bütövlükdə ölkə üçün əvəzsiz töhfədir.

Gənclər və İdman Nazirliyinin bu müsabiqənin təşkilində artıq 4-cü ildir iştirak etdiyini xatırladan nazir müavininin sözlərinə görə, qarşıda daha böyük məqsədlər dayanıb. Bu məqsədlərdən biri yeni nəsil intellektual potensialı formalaşdırmaqdır.

Gəncləri ölkədə yaranan potensialdan istifadə edərək səylə oxumağa çağıran İ.Babayev bildirib ki, gənclərin elmə marağının artırılması istiqamətində nazirlik tərəfindən bir sıra layihələr həyata keçirilir.

Nazir müavininin fikrincə, gənclər bu layihələrə qoşulmaqla öz imkanlarını daha da artıra bilərlər.

Bu müsabiqənin açılış mərasiminin Heydər Əliyev Mərkəzində keçirilməsini təsadüfi saymayan Heydər Əliyev Mərkəzi direktorunun birinci müavini Adil Kərimli bildirib ki, Heydər Əliyev Mərkəzi çoxsaylı fəaliyyət istiqmətləri baxımından diqqət mərkəzindədir.

Bu gün Heydər Əliyev Mərkəzinin elmin, təhsilin inkişafı ilə bağlı çoxsaylı layihələr həyata keçirdiyini vurğulayan A.Kərimli qeyd edib ki, müasir dünyada hər bir ölkənin inkişafı elm və təhsillə ölçülür.

Mərkəz rəsmisinin sözlərinə görə, dövlətin uğurlu gələcəyi gənc nəslin intellektual potensialından asılıdır: "Bugünkü gənc nəslin gələcəkdə Azərbaycanı yüksəklərə qaldıracağına inanırıq. Bu gün Azərbaycan gəncliyi milli-mənəvi dəyərlərimizi, adət-ənənələrimizi, ana dilimizi qoruyub saxlamağa, xalqın ümumbəşəri ideyalarını mənimsəyərək, dünyanın qabaqcıl gəncliyinə inteqrasiya edərək töhfələr verməyə qadirdir. Bu gün yüksək səviyyədə təhsil alan gənc nəsil elmin sirlərinə daha dərindən yiyələnmək, hərtərəfli şəxsiyyət kimi yetişmək üçün öz yolunu sərbəst seçmək baxımından bütün imkanlara malikdir".

Prezident İlham Əliyevin də Azərbaycan gənclərini bilikli, savadlı görmək istədiyini xatırladan A.Kərimli Azərbaycan elminə gənc nəslin gəlməsini vacib hesab edib. Onun sözlərinə görə, "Sabahın alimləri" kimi müsabiqələrin keçirilməsi məktəblilərin elmə marağının artırılması, onların istedad, bacarıq və elmi potensialının üzə çıxarılması baxımından mühüm əhəmiyyət kəsb edir. A.Kərimli "Sabahın alimləri" müsabiqəsinin qaliblərinin bu ilin mayında ABŞ-ın Pitsburq şəhərində keçiriləcək "Intel ISEF" sərgisində uğurla çıxış edəcəyinə inandığını deyib.

Məqalədə:
Xəbər lenti

Xəbər lenti