Azərbaycan, Bakı, 29 may /Trend/
"Bakı 2015" İlk Avropa Oyunlarının rəsmi tərəfdaşı olan "Coca-Cola" şirkəti və Azərbaycan Milli Olimpiya Komitəsi (MOK) ölkəmizi sözügedən mötəbər idman yarışlarında təmsil edəcək idmançılara uğurlar arzulayıb.
Bu gün MOK-un inzibati binasında "Coca-Cola" şirkəti və Olimpiya Komitəsinin rəsmiləri Azərbaycanı qarşıdan gələn "Bakı 2015" Avropa Oyunlarında təmsil edəcək milli yığma komandanın üzvləri ilə görüşüblər. Görüşdə Azərbaycanın gənclər və idman naziri Azad Rəhimov, MOK-un vitse-prezidenti Çingiz Hüseynzadə, "Azerbaijan Coca-Cola Bottlers" şirkətinin baş direktoru Cem Becel, "Bakı 2015"in səfiri Tünzalə Ağayeva və Oyunlarda Azərbaycan milli yığmasının şərəfini qoruyacaq 80-ə yaxın idmançı iştirak edib.
Tədbirdə çıxış edən nazir Azad Rəhimov qeyd edib ki, "Bakı 2015" İlk Avropa Oyunlarının başlanmasına artıq 14 gün qalır və Azərbaycan bu cür möhtəşəm yarışa ev sahibliyi etməyə tam hazırdır: "Qısa bir müddət ərzində böyük işlər həyata keçirilib, yeni yollar istifadəyə verilib, parklar salınıb, idman obyektləri inşa olunub və bu gün biz "Bakı 2015" yarışlarına tam hazırıq. Onu da vurğulamaq istərdim ki, əgər 2012-ci ildə Londonda keçirilən Yay Olimpiya Oyunlarında Azərbaycanı 53 idmançı təmsil edirdisə, "Bakı 2015" Avropa Oyunlarında ölkəmizin şərəfini 291 idmançı qoruyacaq. Biz tərəfdaşlarımızla birgə idmançılarımıza lazımi dəstək verməyə hazırıq və mən ümid edirəm ki, Azərbaycan yığma komandası yüksək nailiyyətlər əldə edəcək. Biz göstərməliyik ki, Azərbaycan əsl idman ölkəsidir".
İdmançılarla görüşdə çıxış edən Çingiz Hüseynzadə "Bakı 2015" Avropa Oyunlarının təşkilini yüksək qiymətləndirib və bildirib ki, hazırda hər şey idmançılarımızdan asılıdır: "Biz qərara gəldik ki, sözügedən yarışlarda medal qazanan hər bir idmançımızı Oyunların ertəsi günü MOK-un inzibati binasında qəbul edək və atletlərimizi onların ailələri və dostları ilə birgə təntənəli şəkildə təbrik edək. Mən "Bakı 2015" Avropa Oyunlarının rəsmi tərəfdaşı olan "Coca-Cola" şirkətinə göstərdiyi dəstəyə görə təşəkkürümü bildirirəm və inanıram ki, Azərbaycan idmançıları bu yarışlarda uğurla çıxış edəcək".
Öz növbəsində Cem Becel İlk Avropa Oyunlarının Azərbaycanda idmanın inkişafına, fəal və sağlam həyat tərzinin təbliğinə təkan verəcəyindən danışdı: ""Bakı 2015" Avropa Oyunlarının rəsmi tərəfdaşı olan "Coca-Cola" şirkəti həm dünyada, həm də Azərbaycanda fəal və sağlam həyat tərzinin təbliği üçün irimiqyaslı layihələr keçirir. Dünyada idman, fəal və sağlam həyat tərzi nə qədər geniş yayılarsa, cəmiyyətlər də bir o qədər inkişaf etmiş olar. Biz əminik ki, Azərbaycanda keçiriləcək İlk Avropa Oyunlarının bu baxımdan cəmiyyətin inkişafında ciddi təsiri olacaqdır. İnanırıq ki, Azrəabaycanı təmsil edən idmançılarımız böyük uğurlar əldə edəcək və öz qələbələri ilə insanlarda idman və fəal həyat tərzinə ilhamlandıracaqlar. İlk Avropa Oyunlarının rəsmi tərəfdaşı, Azərbaycan tarixinin bir hissəsi olmağımızla fəxr edirik və Azərbaycan yığma komandasına bu yarışlarda uğurlar arzu edirik".
Tədbir çərçivəsində "Coca-Cola" şirkəti Azərbaycan idmançılarına üzərində onların adları və müvafiq idman növlərinin piktoqramı əks edilmiş "Coca-Cola" məhsulları təqdim etdi. Avropa Oyunlarının səfiri, tanınmış müğənni, Azərbaycanın əməkdar artisti Tünzalə Ağayeva tədbir iştirakçıları üçün "Coca-Cola" tərəfindən xüsusilə "Bakı 2015" üçün hazırlanmış ruhlandırıcı himni ifa edərək musiqi vasitəsilə idmançılara uğurlar arzulayıb.
İlk Avropa Oyunları Bakıda 12-28 iyun tarixlərində keçiriləcək. Sözügedən yarışmanın əhatə etdiyi 20 idman növündən 12-si "Rio-2016" Yay Olimpiya Oyunları üçün təsnifat imkanları təqdim edərək 50 ölkədən 6 200 idmançının iştirak edəcəyi Avropanın başlıca çoxnövlü idman tədbiridir.
Qeyd etmək lazımdır ki, bu ilin aprel ayında "Coca-Cola" şirkəti "Bakı 2015" video-çarxı və "Coca-Cola"nın Avropa Oyunlarına həsr olunmuş himnini təqdim edib. Təşviqat video-çarxı "Coca-Cola"nın Azərbaycanda yayımlanan televiziya çarxları arasında ən kreativlərindən biridir. Video-çarx və "Coca-Cola" tərəfindən eksklüziv olaraq "Bakı 2015" üçün hazırlanmış himn İlk Avropa Oyunlarının tanınma səviyyəsinin artırılmasına xidmət edir.
1928-ci ildən etibarən Olimpiya hərəkatının ən davamlı tərəfdaşı olan "Coca-Cola" dünyada bir çox digər irimiqyaslı idman tədbirlərini dəstəkləyir. Artıq ardıcıl olaraq üçüncü ildir ki, "Coca-Cola" şirkəti MOK, Azərbaycan Gənclər və İdman Nazirliyi və Təhsil Nazirliyi ilə birgə əməkdaşlığı çərçivəsində ailələr arasında fəal və sağlam həyat tərzini təbliğ edən FASA ("Fəal ailəm, sağlam aləm") proqramını planlı şəkildə inkişaf etdirir. Layihə çərçivəsində oyunlarda Bakı və Azərbaycanın digər regionlarını təmsil edən 50 mindən çox insan iştirak edib. Layihənin qalibi olmuş ailələr və fəal iştirakçıların "Bakı 2015" Avropa Oyunlarının məşəlçisi olmaq fürsəti əldə etmələri FASA tarixində ən əlamətdar hadisədir. Sabirabadda FASA 2014-ün qalibi olmuş Qusarı təmsil edən Əzimovlar ailəsinin başçısı İlham artıq bu şərəfli vəzifəni icra edib. O, öz yürüşünün sonunda Avropa Oyunlarının məşəlini tanınmış teleaparıcı, "Bakı 2015"in səfiri İlkin Həsəniyə ötürüb. Növbəti olaraq 14 may tarixində məşəli Naftalanda Bayramovlar ailəsinin üzvü Lətif daşıyıb. Bu ailə 2014-2015-ci illərdə baş tutmuş bütün FASA yarışlarında fəal olaraq iştirak etmiş ailələrdən biridir.
"Coca-Cola" şirkəti haqqında:
"Coca-Cola" şirkəti (NYSE: KO) sərinləşdirici içkilərin istehsalı üzrə dünya lideridir. Şirkət 500-dən yuxarı brend istehsal edir. "Coca-Cola" şirkəti dünyada ən qiymətli brend kimi qəbul edilib. Dünyada ən çox tanınan və ən bahalı brendlərdən olan "Coca-Cola" ilə yanaşı şirkətin portfoliosuna dəyəri 1 mlrd. ABŞ dollarını ötən 20 brend daxildir. Bunların sırasına "Diet Coke", "Fanta", "Sprite", "Coca-Cola Zero", "vitaminwater", "POWERADE", "Minute Maid", "Simply", "Georgia", "Dasani", "FUZE TEA" və "Del Valle" kimi brendlər aiddir. Qlobal miqyasda "Coca-Cola" şirkəti mineral sular, şirələr, hazır çay və kofe istehsalı sahəsində liderdir. Qlobal yayım sistemi sayəsində dünyanın 200-dən çox ölkəsindəki istehlakçılar şirkətin istehsal etdiyi içkilərdən istifadə edirlər. "Coca-Cola" şirkəti hər gün 1,9 mlrd. içki porsiyası realizə edir. Qeyd etmək lazımdır ki, şirkət ətraf mühitin mühafizəsinə, resursların qorunmasına və regionun iqtisadi inkişafına yönəlmiş ictimai təşəbbüsləri dəstəkləyir. Beləliklə, 700 mindən çox işçisi ilə "Coca-Cola" şirkəti dünyada TOP-onluğa daxildir. "Coca-Cola" şirkəti haqqında daha ətraflı məlumat almaq üçün şirkətin İnternet səhifəsini ziyarət edə bilərsiniz: www.thecoca-colacompany.com.
