...

Bakıda “Sağlam təhsil” sinfi ilə tanışlıq məqsədi ilə mediatur keçirilib (FOTO)

Cəmiyyət Materials 30 Sentyabr 2015 13:09 (UTC +04:00)
Bakıda 47 nömrəli tam orta məktəbdə yaradılmış “Sağlam təhsil” sinfi ilə tanışlıq məqsədi ilə mediatur keçirilib.
Bakıda “Sağlam təhsil” sinfi ilə tanışlıq məqsədi ilə mediatur keçirilib (FOTO)

Azərbaycan, Bakı, 30 sentyabr /Trend, müxbir Elmir Murad/

Bakıda 47 nömrəli tam orta məktəbdə yaradılmış "Sağlam təhsil" sinfi ilə tanışlıq məqsədi ilə mediatur keçirilib.

Trend xəbər verir ki, mediatur zamanı media nümayəndələrinə "Sağlam təhsil" sinifləri barədə geniş məlumat verilib. Bildirilib ki, 2015-2016-cı tədris ilində "Sağlam təhsil-sağlam millət" layihəsi çərçivəsində daha 52 "Sağlam təhsil" sinfi yaradılıb.

Hazırda Bakıda 33, Sumqayıtda 1 ümumtəhsil məktəbi olmaqla, ümumilikdə 34 təhsil ocağında 67 "Sağlam təhsil" sinfi fəaliyyət göstərir. Həmin siniflərdən 15-i ötən tədris ilində yaradılıb.

Qeyd edək ki, "Sağlam təhsil" siniflərində tədris hərəkətli təlim şəraitində həyata keçirilir. Şagird masaları həm oturaraq, həm də ayaqüstə çalışmaq imkanı verir. Bu siniflərdə dərs deyən müəllimlərin maarifləndirməsi işini daha səmərəli təşkil etmək məqsədilə "Sinif gigiyenası" adlı metodik vəsait hazırlanıb və həmin vəsait müəllimlərə çatdırılıb.

Ötən tədris ilindən fəaliyyət göstərən 15 "Sağlam təhsil" sinfində keçirilmiş tibbi monitorinq bu siniflərdə tətbiq edilən texnologiyaların uşaqların sağlamlığına müsbət təsir etdiyini aşkara çıxarıb. Eyni zamanda belə siniflərdə təhsil alan şagirdlərin fiziki və intellektual cəhətdən daha yaxşı inkişaf etdiyi, onların öyrənmə qabiliyyətinin, habelə emosional-psixoloji durumunun yüksəldiyi müəyyən edilib.

"Sağlam təhsil-sağlam millət" layihəsinin əsas məqsədi təhsil alanların təlim nailiyyətlərini yüksəltməklə yanaşı, tədris şəraitindən irəli gələn hərəkət məhdudiyyətini və digər amilləri aradan qaldırmaq, onların sağlamlığını qorumaqdan ibarətdir.

Məqalədə:
Xəbər lenti

Xəbər lenti