...

Kəmaləddin Heydərov: 30-40 min yeni iş yerinin yaradılması gözlənilir (FOTO)

Cəmiyyət Materials 5 Fevral 2016 17:19 (UTC +04:00)
Fevralın 5-də fövqəladə hallar naziri Kəmaləddin Heydərov Salyandakı Heydər Əliyev Mərkəzində Prezident İlham Əliyevin tapşırığına uyğun olaraq rayon ictimaiyyəti nümayəndələri ilə görüşüb.
Kəmaləddin Heydərov: 30-40 min yeni iş yerinin yaradılması gözlənilir (FOTO)

Bakı. Trend:

Fevralın 5-də fövqəladə hallar naziri Kəmaləddin Heydərov Salyandakı Heydər Əliyev Mərkəzində Prezident İlham Əliyevin tapşırığına uyğun olaraq rayon ictimaiyyəti nümayəndələri ilə görüşüb.

Fövqəladə Hallar Nazirliyinin mətbuat xidmətindən Trend-ə verilən məlumata görə, görüşdə Prezident İlham Əliyevin əhalinin məşğulluğunun təmin edilməsi, onun sosial müdafiəsinin gücləndirilməsi, dinamik iqtisadi inkişaf və regionların potensial imkanlarının hərəkətə gətirilməsi ilə bağlı qarşıya qoyulan vəzifələr müzakirə olunub.

Görüşdən əvvəl ümummilli lider Heydər Əliyevin abidəsi önünə gül dəstələri qoyulub, xatirəsi ehtiramla yad edilib.

Görüşdə çıxış edən Salyan rayon İcra Hakimiyyətinin başçısı Tahir Kərimov rayonda aparılan abadlıq-quruculuq işləri, həyata keçirilən infrastruktur layihələri barədə məlumat verib. Bildirib ki, Prezident İlham Əliyevin tapşırığı ilə Salyan şəhərini Babazanlı yaşayış massivi ilə birləşdirən körpünün tikintisi başa çatdırılıb, 4 mərtəbəli "Biznes mərkəzi", rayonun Peyk kəndində 220 şagird yerlik yeni məktəb və Salyan rayonlararası Ağciyər Xəstəlikləri Xəstəxanasının binası istifadəyə verilib. Hazırda Qarabağlı və Kürqaraqaşlı kəndlərində hər biri 100 çarpayılıq uşaq bağçalarının, ərazi kənd təsərrüfatı idarəsinin, Çuxanlı-Gəncəli-Piratman-Parça Xalac-Seydan kəndlərini birləşdirən avtomobil yolunun tikintisi davam etdirilir.

"Regionların və bütövlükdə ölkənin dinamik inkişafı Prezident İlham Əliyevin yürütdüyü siyasətin strateji hədəfidir", - deyən fövqəladə hallar naziri K.Heydərov regionların 2014-2018-ci illərdə sosial-iqtisadi inkişafı Dövlət Proqramının icrasının ikinci ilinin yekunlarına həsr olunmuş konfransda dövlətimizin başçısının qarşıya qoyduğu vəzifələri diqqətə çatdırıb. Qeyd edib ki, dünyada baş verən qlobal iqtisadi böhranın Azərbaycan iqtisadiyyatına təsiri Prezident İlham Əliyevin uzaqgörən siyasəti nəticəsində minimuma endirilib. Yaradılan siyasi sabitlik, güclü iqtisadi potensial, vaxtında aparılan iqtisadi islahatlar neft amilindən asılılığı azaltdığını diqqətə çatdıran nazir bildirib ki, insan amili Prezident İlham Əliyevin həyata keçirdiyi siyasətin mərkəzində durur. K.Heydərov əhalinin sosial müdafiəsinin gücləndirilməsi istiqamətində atılan addımları, o cümlədən maaşların, pensiyaların, sosial müavinətlərin artırılmasını bunun bariz nümunəsi kimi səciyyələndirib.

Görüşdə qeyd olunub ki, dövlətimizin başçısı tərəfindən son günlərdə imzalanan fərman və sərəncamlar, qəbul edilən qərarlar, lisenziyalaşdırma sisteminin təkmilləşdirilməsi, investisiyaların təşviqi və qeyri-neft məhsullarının ixracının stimullaşdırılması özəl bölmənin inkişafına hesablanıb və Salyan rayonu da bu baxımdan istisna təşkil etmir. Yeni iş yerlərinin yaradılmasının əsas məsələlərdən olduğunu deyən K.Heydərov bildirib ki, ölkədə 30-40 min yeni iş yerinin yaradılması gözlənilir.

Nazir deyib ki, rayonda torpaqlardan səmərəli istifadə edilməli, ixracyönümlü məhsulların istehsalına diqqət artırılmalıdır. Aşağı faizlə uzunmüddətli kreditlərin verilməsi bu sahələrin perspektivini stimullaşdırır. Salyan rayonunun iqtisadi potensialına toxunan nazir bildirdi ki, rayonun böyük resursları, infrastrukturu var. Ona görə də bu potensial hərəkətə gətirilməli, pambıqçılıq, üzümçülük, taxılçılıq və aqrar sektorun digər sahələrində əsaslı nəticələrə nail olunmalıdır. Kür çayının imkanlarından maksimum istifadə edilməklə balıqçılıq genişləndirilməlidir. Bütün bunlar isə yüzlərlə yeni iş yerləri deməkdir.

Milli Məclisin deputatı Fəzail Ağamalı Prezident İlham Əliyevin verdiyi tapşırıqların icrasının ölkənin, eləcə də Salyanın inkişafına böyük imkanlar yaratdığını söyləyib.

Görüşdə bir sıra təkliflər səsləndirilib, qaldırılan problemlərin bir qismi yerindəcə həll olunub, bəziləri ilə bağlı müvafiq struktur rəhbərlərinə tapşırıqlar verilib.

Çıxış edən ictimaiyyət nümayəndələri göstərilən diqqət və qayğıya görə dövlətimizin başçısına minnətdarlıqlarını bildiriblər.

Məqalədə:
Xəbər lenti

Xəbər lenti