Bakı. Samir Əli - Trend:
Azərbaycan Xalq Cəbhəsi Partiyasının (AXCP) həbsdə olan üzvü Asif Yusiflinin Bakı Apelyasiya Məhkəməsinin qərarından verdiyi kasassiya şikayətinə baxılacaq tarix müəyyənləşib.
Bu barədə Trend-ə açıqlamasında A.Yusiflinin vəkili Fəxrəddin Mehdiyev bildirib.
Vəkil bildirib ki, kasassiya şikayətinə Ali Məhkəmənin hakimi Əli Seyfəliyevin sədrliyi ilə aprelin 29-da baxılacaq.
Xatırladaq ki, AXCP Ali Məclisi Rəyasət Heyətinin üzvü A.Yusifli Cinayət Məcəlləsinin 178-ci maddəsi ilə (dələduzluq) təqsirləndirilib. Ona qarşı ittiham zərərçəkən Fəridə Zülfüqarovanın şikayəti əsasında irəli sürülüb. A.Yusifli F.Zülfüqarovanın 6500 manat pulunu mənimsəməkdə təqsirləndirilərək Bakı Ağır Cinayətlər Məhkəməsinin hökmü ilə 7 il 6 ay müddətinə azadlıqdan məhrum edilib.
Məhkəmənim hökmünü Bakı Apelyasiya Məhkəməsi 2015-ci il oktyabrın 9-da çıxardığı qərarla qüvvəsində saxlayıb.