Bakı. İlhamə İsabalayeva - Trend:
"İcbari tibbi sığorta tətbiq olunduqdan sonra tibb müəssisələri qəbul etdikləri xəstə sayına, müayinə, müalicə və əməliyyat sayına əsasən maliyyələşəcək. Tibb müəssisələrinin xəstələrinin sayı çox olsa, maliyyələşmə də yüksək olacaq".
Trend-in məlumatına görə, bunu Nazirlər Kabineti yanında İcbari Tibbi Sığorta üzrə Dövlət Agentliyinin direktoru Zaur Əliyev AzTV-yə müsahibəsində deyib.
Z.Əliyev bildirib ki, maliyyələşmə mexanizmlərinə görə, xəstəxanaya gələn gəlirin müəyyən bir hissəsi məhz həkimlərin, orta tibb işçilərinin əməkhaqqına yönləndirilməlidir:
"Dünya ölkələrinin təcrübəsindən məlumdur ki, icbari tibbi sığortanın tətbiqinin əsas məqsədlərindən biri şəffaflıq və rəqabətdir. Xüsusilə dövlət xəstəxanaları arasında rəqabət mühiti yaratmaq lazımdır. Çünki hazırda özəl xəstəxanalar arasında rəqabət mühiti müşahidə edilir, dövlət xəstəxanaları arasında isə rəqabət yoxdur. Ona görə də Agentlik layihəyə hazırlıq mərhələsində dövlət xəstəxanalarında idarəçiliyin dəyişdirilməsi, eyni zamanda xəstəxanaların rəqabət mühitində fəaliyyətinin uğurla təmin olunmasına çalışacaq".
