...

Bakı Şəhər Halqası havada sınaqdan keçirildi (VİDEO)

Cəmiyyət Materials 10 İyun 2016 21:53 (UTC +04:00)
Səmadan Bakı buxtasının mənzərəsi göz oxşayır, xüsusilə də hər yerdə Formula 1 ab-havasının olduğu bir zamanda!
Bakı Şəhər Halqası havada sınaqdan keçirildi (VİDEO)

Bakı. Trend:

Bakı şəhərində bu il ilk dəfə keçiriləcək Formula 1 Avropa Qran-Prisinin başlanmasına 8 gün qaldığı bir ərəfədə Bakı Şəhər Halqası Əməliyyat Şirkəti (BŞH) "Red Bull" skaydayverlərindən Marko Valtenşpil və Corc Latnerin möhtəşəm çıxışının əks olunduğu yeni videoçarxı təqdim edib.

Skaydayverlər Bakının üzərində səmada helikopterdən qanadlı kostyumlarda tullanıb havada inanılmaz uçuş edərək, yüksək sürətlə şəhərin üzərində süzüb və Bakı Şəhər Halqasının hər bir guşəsini yuxarıdan seyr edərək bu səyahətə pit yolunda mükəmməl enişlə son veriblər.

Qanadlı kostyumla etdiyi uçuşdan sonra M.Valtenşpil deyib: "Səmadan Bakı buxtasının mənzərəsi göz oxşayır, xüsusilə də hər yerdə Formula 1 ab-havasının olduğu bir zamanda! Şəhərin üzərində uçarkən və yarışın baş tutacağı trek boyunca hərəkət edərkən bu yarışın nə qədər həyəcanlı olacağını hiss etdim. Bakı sakinlərinə belə ruhlandırıcı anlar yaşatdığıma görə çox sevincliyəm. Bu, ölkəyə ilk səfərimdir, lakin Azərbaycan xalqının qonaqpərvərliyi və şəhərin gözəl mənzərələri məni ən qısa zamanda bura geri dönməyə ilhamlandırır".

Paraşütçülər Bakı səmasında (FOTO)

Paraşütçülər Bakı səmasında (FOTO)

BŞH-nin icraçı direktoru Arif Rəhimov skaydayverlərin uçuşuna belə münasibət bildirib: "Bizim küləklər şəhərini fəth etmək kimi çətin tapşırığa imza atan cəsur "Red Bull" skaydayverlərini qəbul etməkdən məmnunam. İnanıram ki, onların Bakının ən gözəl məkanlarının və yarış trekinin üzərində səmada nümayiş etdirdiyi möhtəşəm uçuşun əks olunduğu bu videoçarx onu izləyən hər bir azərbaycanlını ruhlandıracaq. İlk Formula 1 Avropa Qran-Prisinin başlamasına cəmi 8 gün qaldığı bir ərəfədə hamını bu tarixi hadisədə iştirak etməyə çağırıram. İndidən biletlərinizi alın və Formula 1-in həyəcan dolu yarış həftəsonunda bizə qoşulun".

Məqalədə:
Xəbər lenti

Xəbər lenti