Bakı. İlhamə İsabalayeva - Trend:
Səhiyyə Nazirliyi Angioloji və Mikrocərrahiyə Mərkəzində şəkərli diabet xəstəsi olan Tərlan Əliyevanın sağ ayağını səhvən kəsən həkimi 5 il müddətinə azadlıqdan məhrum etmə cəzası gözləyir.
Bunu Trend-ə Azərbaycan Vəkillər Kollegiyasının üzvü İradə Cavadova deyib.
Onun sözlərinə görə, xəstənin sol ayağının yerinə sağ ayağının kəsilməsi sırf həkim səhlənkarlığıdır.
Hüquqşünas qeyd edib ki, xəstəni əməliyyat edən həkim səhlənkarlığına görə cinayət məsuliyyəti daşıyır. Bununla yanaşı, ona qarşı digər tədbirlər də görülməli və bir çox məsələlər araşdırılmalıdır: “Araşdırılmalıdır ki, həmin şəxs həkim işləyə bilər, ya yox. Əgər o, həkim kimi sertifikasiyadan keçibsə, bundan necə keçib, onun hansı savadına güvənilib? Həkim hansı vəziyyətdə olub ki, bir ayağın yerinə başqa ayağı kəsib? Bütün bu hallar ciddi şəkildə araşdırılmalıdır. Ümid edirəm ki, Səhiyyə Nazirliyi buna ciddi münasibət bildirəcək. Bu, çox ciddi bir məsələdir”.
Xatırladaq ki, Səhiyyə Nazirliyi Angioloji və Mikrocərrahiyə Mərkəzində sol ayağının kəsilməsi üçün diaqnoz qoyulan şəkərli diabet xəstəsi Tərlan Əliyevanın səhvən sağ ayağı kəsilib.
Səhiyyə Nazirliyindən Trend-ə verilən məlumata görə, hazırda məsələ ilə əlaqədar xüsusi komissiya yaradılıb və araşdırmalara başlanılıb. Eyni zamanda, məsələ hüquq-mühafizə orqanları tərəfindən də araşdırılır: "Həm Səhiyyə Nazirliyinin tibbi ekspertizasının, həm də hüquq-mühafizə orqanının araşdırmasının nəticələri toplandıqdan sonra ictimaiyyətə açıqlama veriləcək".
Xəstəxananın həkim-cərrahı Valeh Kərimov xəstənin sağ ayağını səhvən kəsdiyini etiraf edib.