Bakı. İlhamə İsabalayeva - Trend:
Azərbaycanda turoperator və səyahət agentliklərinin sayı artsa da, onların vasitəsilə qəbul edilən və göndərilən turistlərin sayı azalıb.
Trend-in Dövlət Statistika Komitəsinin məlumatlarına istinadən verdiyi xəbərə görə, respublika üzrə 2012-ci ildə 170, 2013-cü ildə 197, 2014-cü ildə 218, 2015-ci ildə isə 243 səyahət agentliyi və turoperator fəaliyyət göstərib.
Turoperator və səyahət agentlikləri vasitəsilə qəbul edilən və göndərilən turistlərin sayı 2012-ci ildə 101 431 nəfər, 2013-cü ildə 91 961 nəfər, 2014-cü ildə 92 305 nəfər olduğu halda, 2015-ci ildə bu rəqəm 61 965 nəfərə enib.
Ötən il yollayışların 4695-i Azərbaycan vətəndaşlarına ölkə daxilində, 38 002-i ölkədən kənarda səyahət etmək üçün, 1 918-i isə xarici ölkə vətəndaşlarına Azərbaycan ərazisində səyahət etmək üçün verilib.