Bakı. Trend:
Bakı Ali Neft Məktəbində (BANM) davamlı şəkildə təşkil olunan “Bərpa olunan enerji mənbələri: çağırışlar və perspektivlər” adlı elmi seminarının növbəti iclası keçirilib.
BANM-in İctimaiyyətlə əlaqələr şöbəsindən Trend-ə verilən məlumata görə, tədbirdə Azərbaycan Milli Elmlər Akademiyasının (AMEA) Akademik H.Əliyev adına Coğrafiya İnstitutunun şöbə müdiri, AMEA-nın müxbir üzvü, fizika riyaziyyat elmləri doktoru Rauf Qardaşov “Günəş radiasiya modeli və onun tətbiqi” adlı məruzə ilə çıxış edib. Sonra məruzədə əks olunan problemlər üzrə fikir mübadiləsi və müzakirələr keçirilib.
Seminarın iclasında BANM-ın Tədris, elm və beynəlxalq əlaqələr üzrə prorektoru Ramiz Hümbətov, Ömürboyu təhsil fakültəsinin dekanı Rəna Mustafayeva, Mühəndislik fakültəsinin dekanı Zəfər Qurbanov, Neft-qaz mühəndisliyi kafedrasının professorları Siyavuş Azakov, Arif Məmmədzadə və Fuad Vəliyev, BANM-in Bərpa olunan enerji mühəndisliyi üzrə tədris və tədqiqat mərkəzinin müdiri Sənan Eminov iştirak ediblər.
Tədbirdə o cümlədən, enerji təhlükəsizliyi, günəş və geotermal enerji istifadəsinin təsirliyi üzrə aparıcı mütəxəssislər, elmi işçilər, ekspertlər – SOCAR-ın nümayəndələri, “Azərenerji” Açıq Səhmdar Cəmiyyətinin (ASC) “Azərbaycan Elmi-Tədqiqat və Layihə-Axtarış Energetika İnstitutu" Məhdud Məsuliyyətli Cəmiyyəti ("AzETvəLAEİ" MMC), AMEA-nın Radiasiya Problemləri İnstitutu, AMEA-nın H.Əliyev adına Coğrafiya İnstitutu, AMEA-nın Geologiya və geofizika İnstitutu, Azərbaycan Respublikası Alternativ və bərpa olunan enerji mənbələri üzrə agentlik, agentliyin “Azalternativenerji” Məhdud Məsuliyyətli Cəmiyyəti, Azərbaycan Respublikasının Prezidenti yanında Dövlət İdarəçilik Akademiyası, Azərbaycan Dövlət Neft və Sənaye Universiteti, Azərbaycan Texniki Universiteti və Azərbaycan Dövlət İqtisadiyyat Universitetinin nümayəndələri seminarın iştirakçıları olublar.
Daimi təşkil olunan “Bərpa olunan enerji mənbələri: çağırışlar və perspektivlər” seminarının əsas məqsədi – müasir biliklərin yayılması və bərpa olunan enerji mənbələri sahəsində çalışan mütəxəssislər arasında BANM-ın Bərpa olunan enerji mühəndisliyi üzrə tədris və tədqiqat mərkəzinin sıx əməkdaşlığı ilə məlumat mübadiləsinin təmin edilməsidır.
Seminarın elmi rəhbəri BANM-in Neft-qaz mühəndisliyi kafedrasının professoru, fizika riyaziyyat elmləri doktoru Siyavuş Azakovdur. İclasın proqramı seminarda iştirak edən mütəxəssislərin təklifləri və mövzuları əsasında qurulur. İclaslarda bərpa olunan enerji mənbələrin istifadəsinin nizamlanması ilə bağlı qanunvericilik, münasib texnologiyalar və bu sahədə dünya təcrübəsi, elmi vəsaitlərin hazırlanması, bərpa olunan enerji mənbələrin istifadəsi ilə bağlı proqram həllərin yaradılması məsələlərinə, həmçinin Azərbaycanda iqtisadi, ekoloji və sosial aspektlərinə baxılır. Müasir enerji qoruyan texnologiyaların tətbiqi ilə bağlı problemlərə böyük diqqət yetirilir.
