Bakı. Trend:
Bakı Ali Neft Məktəbinin (BANM) İctimaiyyətlə əlaqələr şöbəsinin “BANM-in prezident təqaüdçülərinə 10 sual” layihəsində sualları BANM-in Proseslərin avtomatlaşdırılması mühəndisliyi ixtisasının I kurs tələbəsi Əşrəf Abbasov cavablandırır.
- Zəhmət olmasa özünüz haqqında ətraflı məlumat verin.
- Abbasov Əşrəf Namiq oğlu, 1999-cu il aprelin 26-da Bakıda anadan olmuşam. 2005-ci ildə 98 saylı məktəbin I sinfinə getmişəm. 2016-cı ildə həmin məktəbi əlaçı olaraq bitirmişəm. Bildiyiniz kimi, bu il BANM-in Proseslərin avtomatlaşdırılması mühəndisliyi ixtisasına daxil olmuşam. Prezident təqaüdçüsüyəm.
- İmtahan geridə qaldı, indi həmin dövrlə bağlı hansı təəssüratlarınızı bizimlə bölüşə bilərsiniz?
- Əziyyətli idi, amma bu dövrü keçməyə dəyərdi. Hər bir abiturient kimi məndə də imtahan həyəcanı var idi. Hər şey yaxşı qurtardı.
- Nə qədər bal topladınız?
- 685 bal toplamışam.
- Niyə məhz BANM-i seçdiniz?
- BANM-i seçməyim təsadüfi olmadı. Çünki Ali Məktəbimizin Azərbaycanın ən qabaqcıl, ən yaxşı ali təhsil müəssisələrindən biri olduğunu düşünürəm.
- Ailənizin oxumağınızdakı rolu haqqında nə demək istərdiniz?
- Əlbəttə, valideyinlərimin, xüsusilə də anamın böyük rolu var. Uşaqlara təhsil almanın vacibliyini aşılamaq lazımdır. Məncə, anam da bunu çox yaxşı bacarıb.
- Ən böyük arzunuz?
- Uşaqlıqdan kosmonavt olmaq istəmişəm. Absurd səslənsə də, hələ də ən böyük arzum nə vaxtsa kosmonavt olmaqdır.
- İxtisasınız haqqında nə demək istərdiniz?
- Gələcəkdə istedadlı mütəxəssis olacağımı düşünürəm. Çünki təhsil aldığım ixtisas çox lazımlı və gələcək üçün tələb olunan sahədir.
- Hobbiniz nədir?
- Stolüstü tenis oynamağı sevirəm, bunu özüm üçün hobbi hesab edirəm.
- Başqa hansı maraqlarınız var?
- Skeyt sürmək, kubik-rubik yığmaq, oriqami.
- Hansı janrda kitabları oxuyursunuz?
- Əsasən, dram janrında olan kitabları sevirəm. Komikslərlə də maraqlanıram.