...

“Bakı Beynəlxalq Dəniz Ticarət Limanı”nda 20 Yanvar faciəsi anılıb

Cəmiyyət Materials 19 Yanvar 2017 16:11 (UTC +04:00)
“Bakı Beynəlxalq Dəniz Ticarət Limanı” QSC-də 20 Yanvar faciəsinin 27-ci ildönümünə həsr olunmuş anım mərasimi keçirilib.
“Bakı Beynəlxalq Dəniz Ticarət Limanı”nda 20 Yanvar faciəsi anılıb

Bakı. Trend:

“Bakı Beynəlxalq Dəniz Ticarət Limanı” QSC-də 20 Yanvar faciəsinin 27-ci ildönümünə həsr olunmuş anım mərasimi keçirilib.

Qurumdan Trend-ə verilən məlumata görə, dövlət himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayan tədbirdə çıxış edən “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov 20 Yanvar hadisələrinin Azərbaycanın azadlığı və ərazi bütövlüyü uğrunda aparılan mübarizə tarixinə əbədi qəhrəmanlıq səhifəsi kimi daxil olduğunu vurğulayıb.

O bildirib ki, Azərbaycan xalqı 1990-cı il yanvarın 20-də hərbi, siyasi və mənəvi təcavüzə məruz qalsa da, öz tarixi qəhrəmanlıq ənənələrinə sadiq olduğunu, vətənin azadlığı və müstəqilliyi naminə ən ağır sınaqlara sinə gəlmək, şəhid vermək əzmini bütün dünyaya nümayiş etdirib. O qeyd edib ki, 20 Yanvar faciəsinə gerçək hüquqi-siyasi qiymət də məhz ümummilli liderin təşəbbüsü ilə verilib:

“Bu gün də Prezident İlham Əliyevin rəhbərliyi ilə ölkəmiz azad, suveren dövlət kimi inkişafın və uğurun yüksək zirvələrini fəth etməkdədir. Dövlət başçısının yürütdüyü müstəqil siyasət nəticəsində ölkəmizin günbəgün artan inkişafını gördükcə hər birimiz fəxr və qürur hissi ilə deyə bilərik ki, istiqlal şəhidlərimizin canları və qanları bahasına etdikləri fədakarlıq hədər getməyib.”

Daha sonra tədbirdə 20 Yanvar hadisələri vaxtı qəhrəmanlıq göstərmiş və bütün xalqımızla həmrəy olmuş limançılar Mircavan Cabbarov və Eldar Rəcəbov dənizçilərimizin şücaətindən geniş söhbət açıblar.

M.Cabbarov çıxışı zamanı 20 Yanvar günü baş verən hadisələri bir daha gözünün qabağında canlandıraraq bildirib:

“19-dan 20-nə keçən gecə limanda növbətçilik təşkil olunmuşdu. O zaman mən Əsas yük terminalına gəldim və buradakı limançılarla birlikdə limanı konteynerlərlə elə bağladıq ki, gəmidəki düşmənlər Limana daxil ola bilməsinlər. Lakin bu hadisələr biz limançıları qorxutmadı, yaralansaq və xəsarət alsaq da Vətənin azadlığı uğrunda bir yumruq kimi birləşdik”.

Bu hadisələrin canlı şahidi olmasa da bu günün önəmini Azərbaycan tarixi üçün anlayan gənc limançı Cavad Seyidov da çıxış edərək igid oğul və qızların qanı bahasına qazanılan, ümummilli lider Heydər Əliyev tərəfindən təməli qoyulan, eyni zamanda, bu gün Prezident İlham Əliyevin məqsədyönlü siyasəti ilə davam etdirilən dövlət siyasətinin əsasını təşkil edən müstəqilliyin gənc nəsillər tərəfindən qorunub saxlanılmasının vacibliyindən bəhs edib.

Bakı Limanı adından vətənimizin müstəqilliyi uğrunda canından keçən şəhidlərimizə Allahdan rəhmət diləyir, xalqımıza dərin hüznlə başsağlığı veririk.

Məqalədə:
Xəbər lenti

Xəbər lenti