...

“Mizan” Tələbə Dram Dərnəyinin premyerası olub (FOTO)

Cəmiyyət Materials 24 May 2017 19:17 (UTC +04:00)
Dərnəyin ifasında Əbdürrəhim bəy Haqverdiyevin “Yeyəsən qaz ətini, görəsən ləzzətini” əsəri əsasında hazırlanmış tamaşanın premyerası olub.
“Mizan” Tələbə Dram Dərnəyinin premyerası olub (FOTO)

Bakı. Trend:

Azərbaycan Respublikasının Prezidenti yanında Bilik Fondunun “Mədəni maarifləndirmə” proqramı çərçivəsində fəaliyyət göstərən “Mizan” Tələbə Dram Dərnəyinin ifasında Əbdürrəhim bəy Haqverdiyevin “Yeyəsən qaz ətini, görəsən ləzzətini” əsəri əsasında hazırlanmış tamaşanın premyerası olub.

Fonddan Trend-ə verilən məlumata görə, martda Azərbaycan Dövlət Pedaqoji Universitetin nəzdindəki Dövlət Pedaqoji Kollecində yaradılan “Mizan” Tələbə Dram Dərnəyinin (TDD) bədii rəhbəri Azərbaycan Dövlət Mədəniyyət və İncəsənət Universitetinin dosenti, əməkdar artist Məmməd Səfa, layihənin koordinatoru Bilk Fondunun aparıcı məsləhətçisi Ramilə Qurbanlıdır.

Premyerada Pedaqoji Kollecin direktoru Qulu Novruzov, müəllim və tələbə kollektivi, media nümayəndələri və incəsənət xadimləri iştirak ediblər.

Q.Novruzov Bilik Fondu ilə əməkdaşlığın Kollecin müəllim və tələbələri arasında razılıqla qarşılandığını vurğulayaraq, həyata keçirilən birgə maarifləndirici layihələrin səmərəsindən danışıb.

Layihənin koordinatoru R.Qurbanlı “Mizan” Tələbə Dram Dərnəyinin fəaliyyətini yüksək qiymətləndirərək qısa zaman ərzində tələbələrin səhnə əsərini ərsəyə gətirmələrini təqdir etdiyini dilə gətirib.

Dərnəyin bədii rəhbəri, tamaşanın rejissoru əməkdar artist Məmməd Səfa deyib ki, teatr toplu, sintetik sənət növü olduğu üçün müxtəlif ifadə vasitələrinə malikdir. Burada bədii üsullar, saysız-hesabsız kombinasiyalar və müxtəlif tətbiq formaları mümkündür. Teatrın kollektiv yaradıcılıq təbiətinin burada toplaşanlardan fikir və iş birliyi, vahid istiqamətli maarifləndirici qüvvə tələb etdiyini vurğulayan Məmməd Səfa “Mizan” Tələbə Dram Dərnəyininin üzvlərinin məşqlərdə həvəslə iştirak etdiklərini bildirib.

Tələbələrin ifasında göstərilən tamaşa izləyicilərin böyük marağına səbəb olub, həvəskar aktyorlara Bilik Fondunun təşəkkürnamələri təqdim olunub.

Bilik Fondunun “Mədəni maarifləndirmə” proqramı çərçivəsində Azərbaycanın mədəniyyəti, incəsənəti, ədəbiyyatının təbliği və tanıdılması ilə bağlı silsilə layihələr, tədbirlər, görüşlər həyata keçirilir.

Məqalədə:
Xəbər lenti

Xəbər lenti