Vahabizm İslamdan terrorizm ideologiyası kimi istifadə edir ki, bu da qəbuledilməzdir. İslam və terror bir yerə sığa bilməz. Trend bildirir ki, sentyabrın 20-də "İslam icmalarının həmrəyliyi" beynəlxalq konfransının açılışında Qafqaz Müsəlmanları İdarəsinin (QMİ) sədri, Şeyxulislam Allahşükür Paşazadə bu bəyanatla çıxış edib.
O, xatırladıb ki, bugünkü gündə dünyanın müxtəlif yerlərində, o cümlədən Dağıstan və Çeçniyada terror aktları baş verir ki, bu da islam dünyasının nümayəndələrini narahat etməyə bilməz. "Vahabizmin bir məqsədi var - İslamı parçalamaq. Biz həmin məsələni araşdırmalı və hazırkı vəziyyətə öz qiymətimizi verməliyik"-deyə QMİ sədri bildirib və qeyd edib ki, Qafqazda "tarixi birlik"də birləşmiş bir çox dini cərəyanların nümayəndələri yaşayır.
A. Paşazadənin sözlərinə görə, müəslmanları birliyə çağırış "parçalamaq naminə birliyi" nəzərdə tutmur. "Bizim məqsədimiz müxtəlif dinlərin nümayəndələrinin birliyinə kömək etməkdir.Birlik naminə "çoxluqdan vəhdətə doğru" qüvvələri yönəltmək lazımdır"-deyə QMİ sədri qeyd edib və bildirib ki, müsəlmanların arasına parçalanma salmaq arzusu Sovet İttifaqından miras qalıb.
Sonda Şeyxulislam Allahşükür Paşazadə Ermənistan-Azərbaycan münaqişəsinin nizama salınması məsələsinə toxunub və Bakının Azərbaycan ərazilərinin erməni işğalından azad edilməsinə yönəldilmiş ədalətli siyasətini dəstəklədiyinə görə İslam dövlətlərinin nümayəndələrinə təşəkkür edib.
Qeyd edək ki, ikigünlük konfrans QMİ və İİR-nın Azərbaycandakı səfirliyinin Mədəniyyət Mərkəzinin səyləri ilə təşkil edilib.