90 saylı Ağdaş Seçki Dairəsindən deputatlığa namizədliyini irəli sürmüş Çingiz Qəniyev Azərbaycan Respublikası Mərkəzi Seçki Komissiyasının (MSK) və Baş Prokurorluğun apardığı araşdırmaların nəticəsini gözləyir. Bu barədə Trend ə Çingiz Qəniyev məlumat verib.
"90 saylı Ağdaş Seçki Dairəsindən MSK-ya daxil olmuş şikayətlər araşdırılmaq üçün 20 noyabr 2005-ci il tarixdə MSK-nın 49/229 saylı qərarı ilə Baş Prokurorluğa göndərilib. Baş Prokurorluğun əməkdaşları Ağdaş rayonunda mənim şikayətlərim əsasında apardıqları 3 günlük yoxlamaları bu gün başa çatdırıblar. MSK-nın və Baş Prokurorluğun rəsmi cavabını gözləyirəm. Əgər Prokurorluğun apardığı araşdırmaların nəticəsi məni qane etməsə, hüquqlarımın bərpası ilə əlaqədar məhkəməyə müraciət edəcəm", - deyə Ç.Qəniyev söyləyib.
Parlament seçkisində yüksək səs topladığını iddia edən Çingiz Qəniyev onu da bildirib ki, əgər yerli məhkəmələr tərəfindən hüquqları bərpa edilməsə, Avropa Məhkəməsinə müraciət edəcək.