Azərbaycan, Bakı, 20 aprel /Trend/
Vüqar Həşimovun xatirəsinə həsr olunan "ShamkirChess 2015" turnirində 4-cü tur başa çatıb.
Trend-in məlumatına görə, dünya çempionu Maqnus Karlsen hesabat turunda autsayder Maykl Adamsla heç-heçə oynayıb.
Partiyadan sonra keçirilən mətbuat konfransında norveçli qrossmeyster heç-heçənin sürpriz olmadığını bildirib: "Partiyanın əvvəlindən üstünlük qazanmaq istədim. Fiqurların dəyişdirilməsi belə kömək olmadı. Ağ fiqurlar üçün daha geniş imkanlar görünürdü. Təhlükə çox az idi. Bu mənada heç-heçə normal nəticədir. Adamsla xalı yarı bölmək sürpriz deyil. Rəqib kifayət qədər yaxşı müdafiə olundu. Ümumilikdə 4 turdan sonra çıxışımı yaxşı qiymətləndirirəm. Nəticə baxımından normaldır. Əminəm ki, növbəti 5 tur daha çətin olacaq. Hazırda turnir cədvəlindəki mövqeyim barədə düşünmürəm".
İngiltərə şahmatçısı M.Adams isə onun üçün əsas mübarizənin bu turdan başladığını söyləyib: "Çətin partiya idi. Karlsen üstünlük qazanmaqla dönüş yaratmağa cəhd edirdi. Qarışıqlıqda oynamaq asan deyil. Fikrimcə, dünya çempionu ilə heç-heçə pis nəticə deyil. Razıyam ki, Şəmkirdə hələlik öz oyunumu göstərmirəm. Turnir mənim üçün bir qədər yaxşı başlamadı. Bununla belə, əsas mübarizə qarşıdadır. Əsas partiyalar hələ başlamayıb".
