...

Bakıda Avropa Velosipedçilər Birliyinin Rəhbər Komitəsinin iclası keçirilib

İdman Materials 22 İyun 2015 17:02 (UTC +04:00)
Respublika Velotrekində Avropa Velosipedçilər Birliyinin (AVB) Rəhbər Komitəsinin iclası keçirilib.
Bakıda Avropa Velosipedçilər Birliyinin Rəhbər Komitəsinin iclası keçirilib

Azərbaycan, Bakı, 22 iyun /Trend/

Respublika Velotrekində Avropa Velosipedçilər Birliyinin (AVB) Rəhbər Komitəsinin iclası keçirilib.

Azərbaycan Velosiped İdmanı Federasiyasından Trend-ə verilən məlumata görə, iclasda aşağıdakı məsələlər müzakirə edilib: Direktorlar Şurasının son iclasının protokolunun təsdiq edilməsi; AVB-nin 2015-ci il üçün Həmrəylik Proqramı; maliyyə və büdcə məsələləri; 2014-cü ilin yekunlarına əsasən AVB auditorlarının tövsiyələri; növbəti Avropa çempionatına hazırlıq; peşəkar velosiped idmanında və velotrek yürüşlərində islahatlar və s.

Avropa Velosipedçilər Birliyinin prezidenti David Lappertyen iclasın açılışındakı çıxışında qeyd edib ki, Avropanın bütün idman aləmi üçün əlamətdar bir vaxtda Komitənin iclasının Bakıda keçirilməsi böyük əhəmiyyət kəsb edir: "Komitə üzvləri Bakıda birinci Avropa Oyunlarının əla səviyyədə təşkil edilməsinin və keçirilməsinin şahidi olublar. Velosiped idmanının üç növü üzrə yarışlar yüksək səviyyədə keçirilir. Biz Avropa Olimpiya Komitəsinə tövsiyə edəcəyik ki, gələcəkdə trek üzrə yarışlar qitə Oyunlarının proqramına daxil edilsin".

D.Lappartyen Azərbaycan rəhbərliyi və ölkəmizin Velosiped İdmanı Federasiyası tərəfindən idmanın bu növünün inkişafına göstərilən daimi qayğıya görə təşəkkürünü bildirib. O, həmçinin qeyd edib ki, Azərbaycanın idman arenaları və velosiped idmanı bazaları Avropada ən yaxşılar sırasındadır.

Azərbaycan Velosiped İdmanı Federasiyasının vitse-prezidenti Sahib Ələkbərov qonaqları salamlayaraq qeyd edib ki, Azərbaycanın idman arenaları həqiqətən əla səviyyədədir və bu, istər idmanın inkişafı baxımından, istərsə də ölkəmizin potensialını Avropaya və bütün dünyaya nümayiş etdirmək üçün çox vacibdir. Bütün bunlar Azərbaycan Prezidenti İlham Əliyevin idmanın, o cümlədən velosiped idmanının inkişafına qayğısı sayəsində mümkün olub.

Azərbaycanda idmanın gimnastika, güləş, boks, cüdo, taekvando və bir sıra başqa növləri üzrə zəngin ənənələr yaranmasını vurğulayan S.Ələkbərov əmin olduğunu bildirib ki, Bakı-2015 yarışlarında təmsil edilmiş bir sıra başqa idman növləri də Avropa Oyunlarından sonra fəal inkişaf edəcək.

Bakı-2015 ilk Avropa Oyunlarının Əməliyyat Komitəsinin idman bölməsinin direktoru Pirs O'Kallaqan deyib: "Avropa Oyunlarının keçirilməsi haqqında söhbətlər son 40 ildə davam edirdi. 2012-ci ildə 12 beynəlxalq idman federasiyasının rəhbərləri ilə razılıq əldə ediləndən sonra Avropa Oyunlarının keçirilməsi qərara alınıb. Avropa Olimpiya Komitəsinin Romada keçirilmiş Baş Assambleyasında isə bu təşkilatın üzvlərinin əksəriyyəti Bakının namizədliyinə səs verib. Biz Azərbaycan hökuməti ilə çox sıx əlaqə saxlayırdıq, çünki vaxt həqiqətən çox az idi. Azərbaycan bu Oyunları yüksək səviyyədə keçirməyə nail oldu. Artıq bu gün demək olar ki, Avropa Oyunları bütün dünyada populyarlıq qazanıb. Yarışlar 140-dan çox ölkəyə translyasiya edilir. İdman obyektlərinin demək olar ki, hamısı azarkeşlərlə doludur. İyunun 21-də təkcə bir arenada 22 mindən çox adam var idi".

P.O'Kallaqan velosiped idmanı üzrə yarışların hazırlanmasında və keçirilməsində Azərbaycan Velosiped İdmanı Federasiyasının rolunu xüsusi vurğulayıb. "Tour d'Azerbaïdjan-2015" veloyürüşünün uğurla başa çatması Bakının şose yollarında yürüşün də uğurla keçməsinin rəhni olub. Avropa Oyunları paytaxtının yollarında veloyürüşün yüksək səviyyəsinə dəlalət edən bir fakt da ondan ibarətdir ki, həmin yarışlarda Olimpiya çempionu və Avropanın bir sıra ən yaxşı velosipedçiləri iştirak edirdi. Onun sözlərinə görə, milli nümayəndə heyətlərinin iştirakçıları Avropa Oyunlarının ən yüksək səviyyədə keçdiyini qeyd edirlər.

Məqalədə:
Xəbər lenti

Xəbər lenti