Bakı. Trend:
Bu gün Azərbaycanın məşhur şahmatçısı Vüqar Həşimovun doğum günüdür. Beynəlxalq qrossmeyster yaşasaydı, 30 yaşı tamam olacaqdı.
Bu münasibətlə görkəmli şahmatçı, qrossmeyster Vüqar Həşimovun xatirəsinə həsr olunan uşaqlar arasında beynəlxalq şahmat turnirinə start verilib. Beynəlxalq turnirin iştirakçıları əvvəlcə II Fəxri xiyabanda Vüqar Həşimovun məzarını ziyarət edərək onun xatirəsinə dərin ehtiramlarını bildiriblər.
Açılış mərasimindən əvvəl Azərbaycan Şahmat Federasiyasının, Gənclər və İdman Nazirliyinin rəsmiləri, yarış iştirakçıları, qonaqlar, hakimlər II Fəxri xiyabanda Vüqar Həşimovun məzarını ziyarət ediblər.
Turnirin açılış mərasimində ilk olaraq Vüqar Həşimovun atası Qasım Həşimov danışıb. O bildirib ki, sayca üçüncü dəfə keçirilən beynəlxalq turnir ənənəvi olaraq hər il təşkil olunacaq: "Biz bu turniri hər il keçirməyə çalışacağıq. Bizə dəstək olan şəxslərə, şəxsən gənclər və idman naziri Azad Rəhimova təşəkkür edirəm. Bu turnir uşaqların şahmata olan marağını artıracaq. İnanıram ki, gələcəkdə onların arasından yığmamızın şərəfini qoruyacaq şahmatçılar çıxacaq. Vüqar həmişə uşaqlara dəstək olub. Dəfələrlə Gəncədə seans təşkil edib. Bu gün onun doğum günüdür. O, hər zaman bizimlədir. Bütün iştirakçılara, xarici ölkələrdən gələn qonaqlara təşəkkür edirəm. Şahmatçılara uğurlar arzulayıram".
Turnirin direktoru Anar Allahverdiyev qeyd edib ki, 5 ölkədən 126 yeniyetmənin iştirak etdiyi turnir 9 turdan ibarət olacaq. Beynəlxalq turnirə avqustun 1-də yekun vurulacaq.
Sonra Azərbaycan Respublikasının Dövlət himni səsləndirilib.
Qeyd edək ki, sayca üçüncü memorialda medallar uğrunda 8, 10 və 12 yaş kateqoriyalarında oğlan və qızlar mübarizə aparacaqlar. Turnirin iştirakçıları sırasında şahmat üzrə Avropa və dünya uşaq çempionatlarının mükafatçıları, ölkə çempionları, reytinqi 1600 və ondan yüksək olan şahmatçılar olacaq. Ümumiyyətlə, turnirdə 130-dan çox şahmatçı iştirak edəcək. Yarışda azərbaycanlı şahmatçılarla yanaşı, Belarus, Rusiya, Gürcüstan, İran və digər ölkələrin təmsilçiləri də iştirak edəcəklər.
Turnirin qalibi Vüqar Həşimov Kubokunu əldə edəcək, habelə “Baku Open 2016” ənənəvi beynəlxalq turnirinə vəsiqə qazanacaq. Gümüş mükafatçı “Naxçıvan Open 2017”-də iştirak etmək imkanı əldə edəcək. Uşaqlar arasında Vüqar Həşimov Memorialında digər şahmatçılar da nominasiyalar üzrə mükafatlandırılacaq.
