Bakı. Maksim Tsurkov - Trend:
Yüksək rəqabətə baxmayaraq azərbaycanlı idmançı qızlar Bakıdakı idman gimnastikası üzrə Dünya kubokunda layiqincə iştirak etməyə çalışacaq.
Bunu Trend-ə qadınlar arasında idman gimnastikası üzrə Azərbaycan milli komandasının baş məşqçisi Nina Pravdina deyib.
Onun sözlərinə görə, gimnastlar hazırlıqları davam etdirirlər: “Hazırlığımız yaxşı səviyyədədir. İşlərimizi davam etdiririk. Əlbəttə, işimiz çətindir, çünki üzərimizdə böyük məsuliyyət var. Doğma divarlar kömək etsə də, məsuliyyət iki dəfə artıqdır”.
Hər hansı proqnoz verməyən baş məşqçi rəqabətin yüksək səviyyəsini qeyd edib: “Mən heç vaxt gözləntilər barədə danışmıram. Yaxşı nəticə əldə etmək üçün işləmək lazımdır. Biz layiqli şəkildə çıxış etməyə çalışacağıq. Bu il rəqabət çox yüksəkdir. Çoxlu sayda adlı-sanlı idmançı gələcək. Əsas rəqiblər arasında Rumıniyanı qeyd edə bilərəm. Yunanıstandan güclü idmançılar olacaq. Əlbəttə ki, Özbəkistandan Oksana Çusovitinanı da qeyd etmək lazımdır. O, böyük təcrübəyə malikdir və medallar uğrunda mübarizədə heç kimə güzəştə getməyəcək”.
Milli komandanın lideri Marina Nekrasova qeyd edib ki, qızların hədəfləri müxtəlifdir, çünki hər biri müxtəlif alətlərlə iştirak edəcək: "Bu mərhələdə çoxnövçülük olmayacaq. Yekaterina Tişkova və Mariya Smirnova bir alətlə, mən və Yuliya İnşina 3 alətlə çıxış edəcəyik. Bizim məqsədimiz finallara çıxmaq və orada mükafatlar uğrunda mübarizə aparmaqdır. Güclü rəqiblərimiz çoxdur, Olimpiya və Avropa çempionları olacaq. Ümid edirik ki, hazırladığımız nömrələri meydançada göstərə biləcəyik”.
Gimnast həmçinin, tamaşaçıları Dünya kubokunda idmançılarımızı dəstəkləməyə çağırıb: “Onlara demək istəyirəm ki, bizə azarkeşlik edin və dəstəkləyin. Sizin ümidlərinizi doğrultmağa çalışacağıq”.
Qeyd edək ki, 16-19 mart tarixlərində Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi keçiriləcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən ümumilikdə 85 kişi, 35 qadın idmançının çıxışı gözlənilir.
Turnirin ilk 2 günü təsnifat mərhələləri, son 2 günü isə ayrı-ayrı alətlər üzrə finallar baş tutacaq. Yeni Olimpiya dövrünün 2017-ci ildən qüvvəyə minən yeni qaydaları əsasında kişi gimnastlar 6, qadın gimnastlar isə 4 dəst medal uğrunda mübarizə aparacaqlar.
Məşhur kişi idmançılar arasında Olimpiya çempionları Elefterios Petrunias (Yunanıstan), Kristian Berki (Macarıstan), Olimpiya Oyunlarının gümüş mükafatçısı Filip Ude (Xorvatiya) və Avropa çempionu Aleksandr Şatilov (İsrail) peşəkar çıxışları ilə hər kəsi heyran edəcəklər.
Qadın idmançılar arasında isə 3 qat Olimpiya çempionu Katalina Ponor (Rumıniya) və Olimpiya Oyunlarının qızıl medalçısı Oksana Çusovitina (hazırda Özbəkistanı təmsil edir) kimi məşhur gimnastlar yer alacaqlar.
Ölkəmizi kişi idman gimnastikası üzrə yarışlarda Murad Ağarzayev, Bense Talas, qadın idman gimnastlarının turnirində isə Yuliya İnşina, Marina Nekrasova, Mariya Smirnova və Yekaterina Tişkova təmsil edəcəklər.
