...

Fransa gimnastı: Bakıda keçirilən turnirləri səbirsizliklə gözləyirəm

İdman Materials 28 Aprel 2017 16:59 (UTC +04:00)
Mən hər dəfə Bakıda keçirilən bədii gimnastika üzrə beynəlxalq tədbirləri səbrsizliklə gözləyirəm
Fransa gimnastı: Bakıda keçirilən turnirləri səbirsizliklə gözləyirəm

Bakı. Ləman Zeynalova - Trend:

Mən hər dəfə Bakıda keçirilən bədii gimnastika üzrə beynəlxalq tədbirləri səbrsizliklə gözləyirəm.

Bunu Trend-ə fransalı gimnast Kseniya Mustafayeva deyib.

Onun sözlərinə görə, burada tamaşaçılar gimnastları çox gözəl dəstəkləyir.

Gimnast vurğulayıb ki, Bakıdakı turnirlərdə işıqlandırma onun xoşuna gəlir: “Bizdə Fransada da Tiedə Qran-pri keçirilir və işıqlandırma eynidir. Bütün işıq meydançaya yönəlir. Alətlərlə çıxış etmək rahat olur”.

Qeyd edək ki, aprelin 28-də Bakıda bədii gimnastika üzrə FIG Dünya Kuboku yarışlarına start verilib. Aprelin 30-dək davam edəcək yarışlara 21 ölkədən 92 gimnast qatılıb. Onlardan 34 nəfəri fərdi proqramda, 58 nəfəri isə ümumilikdə 10 qrup hərəkətləri komandasının tərkibində çıxış edir.

Ölkəmizi bu turnirdə yeniyetmələr proqramında Avropa çempionatının gümüş və bürünc medalçısı Jalə Piriyeva, istedadlı gimnast Zöhrə Ağamirzəyeva, həmçinin Avropa çempionatının qrup hərəkətləri komandasının tərkibində gümüş medalçıları Siyana Vasileva, Diana Doman, Aleksandra Platonova, Ayşən Bayramova və Elif Zeynep Celep təmsil edirlər.

Yarışların ilk iki günü təsnifat mərhələlərinin nəticələrindən asılı olaraq, həm fərdi gimnastlar, həm də qrup hərəkətləri komandaları arasında çoxnövçülük üzrə qaliblər və ayrı-ayrı alətlər üzrə finalçılar müəyyənləşəcək. Finallar isə turnirin son günü keçiriləcək.

Üç gün ərzində tamaşaçılar Azərbaycanın tanınmış gimnastları ilə yanaşı, bir çox xarici favorit idmançıların da çıxışlarını izləmək şansı əldə edəcəklər. Belə ki, yarışlarda 2 qat dünya çempionu və Avropa çempionu Aleksandra Soldatova (Rusiya), Avropa çempionatının bürünc mükafatçısı Zelikman Nikol (İsrail) və Rusiya (Olimpiya Oyunlarının qızıl medalçısı), İspaniya (Olimpiya Oyunlarının gümüş medalçısı), Bolqarıstan (Olimpiya Oyunlarının bürünc medalçısı), Belarus (dünya çempionatının bürünc mükafatçısı) qrup hərəkətləri komandaları iştirak edirlər.

Məqalədə:
Xəbər lenti

Xəbər lenti