Bakı. Trend:
Dünya Bankının müraciətinə əsasən bu qurumun mərkəzi ofisi üçün Azərbaycanın avtomatlaşdırılmış sosial yardım sisteminin təqdimatı keçirilib. Dünya Bankı Azərbaycanın avtomatlaşdırılmış sosial yardım sisteminin qabaqcıl təcrübə nümunəsi kimi dünyada təbliğini məqsədəuyğun hesab edir.
Bu barədə Trend-ə Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.
Son illərdə ölkəmizin əmək və sosial müdafiə sahələrində elektron əsaslar üzərində qurulan şəffaf idarəetmə və xidmət sistemlərinə mötəbər beynəlxalq təşkilatlar tərəfindən də maraq artmaqdadır. Belə qurumlardan biri olan Dünya Bankının ekspert qrupunun Azərbaycan Əmək və Əhalinin Sosial Müdafiəsi Nazirliyinə müraciəti nəzərə alınaraq, bu təşkilatın Vaşinqton şəhərində (ABŞ) yerləşən mərkəzi ofisi üçün nazirliyin ünvanlı dövlət sosial yardımı üzrə Vahid Elektron Müraciət və Təyinat Alt Sisteminin (VEMTAS) videokonfrans vasitəsilə geniş təqdimatı keçirilib.
Əmək və əhalinin sosial müdafiəsi nazirinin müavini İdris İsayev ölkəmizdə informasiya-kommunikasiya texnologiyalarının tətbiqinin əmək və sosial müdafiə sahələrində də uğurla həyata keçirildiyini diqqətə çatdırıb. Bu sahələrdə məhz Azərbaycanın öz mütəxəssisləri tərəfindən hazırlanmış mükəmməl avtomatlaşdırılmış sistemlərin qurulmasının müasir və operativ idarəetmənin formalaşmasına, xidmət sahələrində şəffaflığın artırılmasına, sosial xidmətlərdə “bir pəncərə” prinsipi üzrə e-xidmətlərin göstərilməsinə imkan verib”.
Qeyd olunub ki, bu gün dünyanın digər bir çox ölkələrində əmək və sosial müdafiə sistemi üzrə xidmətlərinin elektron xidmətlər formasında əhaliyə çatdırılması onların gündəliyində dayanan başlıca məsələlərdəndir. Bunun həyata keçirilməsi isə məsələyə sistemli yanaşmanı, tədbirin reallaşdırılması mərhələlərində çevikliyi və əlbəttə ki, ilk növbədə möhkəm və güclü siyasi iradənin olmasını tələb edir. Məhz Azərbaycan Prezidenti İlham Əliyevin bu sahəyə xüsusi diqqəti və güclü siyasi iradəsi , eləcə də Nazirliyin rəhbərliyinin və kollektivinin gərgin əməyi, xüsusi ilə də informasiya texnologiyaları sahəsində çalışan mütəxəssislərin peşəkarlığı nəticəsində ölkəmizdə belə bir uğurlu elektron sistemləri formalaşmışdır.
Nazir müavini bildirib ki, 2016-cı ilin 15 fevralından tətbiq olunan VEMTAS dövlət sosial yardım sistemində bütün prosedurların məmur-vətəndaş kontaktları olmadan, tam elektron qaydada həyata keçirilməsinə imkan yaradıb: “Vətəndaşlar təmsil etdikləri ailələrin sosial yardım almaq hüquqlarına baxılması üçün internet əlaqəsi olan istənilən nöqtədən və istənilən vaxt kompüterlər, mobil telefonlar və s. vasitəsilə müraciət edə bilirlər. Ailələr barədə sistemə daxil edilən məlumatların yoxlanılması 20-dən çox qurumun elektron məlumat bazalarına inteqrasiya şəraitində həyata keçirilir və məlumatların təhlili, qərar qəbul etmə prosesi də avtomatik şəraitdə yerinə yetirilir. Bu prosedur VEMTAS-ın finksional imkanlarının kifayət qədər əhatəli olduğunu və onun proqram təminatı formatının gələcəkdə digər mühüm fəaliyyət sahələrinin avtomatlaşdırılması üçün mühüm əsas ola biləcəyini göstərir”.
Diqqətə çatdırılıb ki, VEMTAS-ın tətbiqi ilə “Ünvanlı sosial yardımla bağlı müraciətin edilməsi” e-xidməti də “E-hökumət” portalına inteqrasiya edilib və portalda həmin vaxtdan ən çox istifadə edilən e-xidmətlər sırasında olan bu e-xidmətə cari ilin 01 yanvar tarixinədək 1 milyon 835 min 235 dəfə müraciət olunub.
Ümumilikdə Əmək və Əhalinin Sosial Müdafiəsi Nazirliyinin fəaliyyət sahələrinin avtomatlaşdırılması nəticəsində bu sahələr üzrə 30-a qədər elektron xidmət əhalinin istifadəsinə verilib. İctimai marağın yüksək olduğu həmin e-xidmətlərdən təkcə 2016-cı il ərzində 6 milyon 550 min dəfə istifadə edilib.
Sonra Əmək və Əhalinin Sosial Müdafiəsi Nazirliyinin İnformasiya texnologiyaları şöbəsinin müdiri Elnur Məcidov avtomatlaşdırılmış sosial yardım sisteminə, onun proqram təminatlarına, sosial yardım üçün müraciət edilməsi və müraciətlərə baxılması, yardım təyin edilib-edilməməsi barədə qərar qəbulunun avtomatlaşdırılmış qaydada həyata keçirilməsi prosedurlarına dair təqdimatla çıxış edib. E.Məcidov həmçinin Dünya Bankının mərkəzi ofisinin əməkdaşlarının aidiyyəti mövzuda suallarını cavablandırıb.
Dünya Bankının mərkəzi ofisinin ekspertləri xidmət sahələri üzrə elektron texnologiyalardan səmərəli istifadə əsasında əhalinin tam şəffaf və əlçatan sistemlərlə təmin edilməsinin müasirləşmə və inkişaf prosesinin önəmli göstəricilərdən olduğunu vurğulayıblar. Onlar Azərbaycanın avtomatlaşdırılmış sosial yardım sisteminin qabaqcıl təcrübə nümunəsi kimi dünyada təbliğinin məqsədəuyğun olduğunu qeyd ediblər. Dünya Bankının nümayəndələri keçirilən hazırkı təqdimatın da bu uğurlu təcrübənin öyrənilməsi və təbliğinin dəstəklənməsi məqsədinə xidmət etdiyini bildirib, bunun üçün yaradılan şəraitə görə nazirliyə təşəkkürlərini ifadə ediblər.
