...

Azərbaycanın İran vilayətləri ilə əlaqələri genişlənir

İqtisadiyyat Materials 24 Fevral 2017 11:23 (UTC +04:00)
Azərbaycan nümayəndə heyəti İranda səfərdə olub.
Azərbaycanın İran vilayətləri ilə əlaqələri genişlənir

Bakı. Trend:

Azərbaycan nümayəndə heyəti İranda səfərdə olub. İqtisadiyyat naziri, Azərbaycan ilə İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədri Şahin Mustafayevin rəhbərlik etdiyi nümayəndə heyətində rəsmi şəxslər və iş adamları olublar.

İqtisadiyyat Nazirliyindən Trend-ə verilən məlumata görə, səfərin ilk günü nazir Şahin Mustafayev Ərdəbildə İranın rabitə və informasiya texnologiyaları naziri, Dövlət Komissiyasının həmsədri Mahmud Vaezi, Ərdəbil əyalətinin valisi Məcid Xudabəxş və Ərdəbil vilayətindən olan millət vəkilləri ilə görüşüb. Görüşdə dövlət başçılarının siyasi iradəsi, şəxsi dostluq münasibətləri nəticəsində son illərdə Azərbaycan-İran əlaqələrinin strateji səviyyəyə yüksəldiyi vurğulanıb, Azərbaycan-İran iqtisadi əlaqələrinə, birgə layihələrə və İranın Ərdəbil vilayəti ilə əməkdaşlığın genişləndirilməsi perspektivlərinə dair müzakirələr aparılıb.

Nazir Ş.Mustafayev qeyd edib ki, Azərbaycan Prezidenti İlham Əliyev İran ilə əlaqələrə böyük önəm verir. Son 3 ildə Azərbaycan və İran prezidentləri 7 dəfə görüşüb. Dövlət başçılarının siyasi iradəsi, səmimi dostluq münasibətləri iqtisadi əməkdaşlığın daha da genişləndirilməsi üçün möhkəm zəmin yaradıb. Ş.Mustafayev 2016-cı ildə İran və Azərbaycan arasında ticarət dövriyyəsinin 70 faizə yaxın artdığını, viza rejiminin sadələşdirilməsi istiqamətində işlərin görüldüyünü, iş adamlarının iştirakı ilə 15 tədbirin keçirildiyini diqqətə çatdırıb. Viza rejiminin sadələşdirilməsi nəticəsində 2017-ci ilin əvvəlindən başlayaraq İran vətəndaşları 3 gün ərzində elektron vizalar ala bilir. Prezident İlham Əliyevin yeni sərəncamı ilə bütün sərhəd-keçid məntəqələrində viza verilməsi təmin ediləcək, turistlərin sürətli keçidi üçün xüsusi zolaqlar yaradılacaq, sərhəd məntəqələrinin iş saatları artırılacaq. 2017-ci il üçün beynəlxalq yükdaşımalarında mübadilə edilən icazələrin sayının 10 minə çatdırılması və tranzit xərclərinin 160 ABŞ dollarından 100 ABŞ dollarınadək endirilməsi barədə razılığa gəlinib. Bütün bunlar əlaqələrin inkişafı, iş adamları arasında əməkdaşlığın genişləndirilməsi üçün geniş imkanlar yaradır.

İranın Ərdəbil vilayəti ilə əməkdaşlıq imkanlarından danışan Ş.Mustafayev kənd təsərrüfatı, qida sənayesi, nəqliyyat, turizm və s. sahələrdə əməkdaşlıq imkanlarını vurğulayıb. Qeyd olunub ki, meyvə, ət və ət məhsulları, süd və süd məhsulları, xüsusilə kartofçuluğun inkişaf etdiyini nəzərə alaraq bu istiqamətlərdə vilayətlə əməkdaşlıq həyata keçirilə bilər. Bundan başqa, İran şirkətləri, o cümlədən Ərdəbil iş adamları Azərbaycanın Aktaudakı logistika mərkəzinin xidmətlərindən istifadə edə, Azərbaycanda yaradılan sənaye parkalrına və aqroparklara investisiya yatıra bilərlər. Nazir Ş.Mustafayev iş adamlarını Azərbaycan-İran iqtisadi əlaqələrinin inkişafı üçün mövcud olan əlverişli şəraitdən və yaradılan imkanlardan istifadə etməyə dəvət edib.

İranın rabitə və informasiya texnologiyaları naziri, Dövlət Komissiyasının həmsədri Mahmud Vaezi Azərbaycan nümayəndə heyətinin İrana səfərindən məmnunluğunu ifadə edib, ölkəsinin Azərbaycanla əlaqələrin genişləndirilməsinə önəm verdiyini, son illərdə dövlət başçılarının birgə səyi nəticəsində Azərbaycan-İran əlaqələrinin yüksək səviyyəyə çatdığını bildirib. Ölkələr arasında qarşılıqlı səfərlərin intensivliyi əlaqələrin genişləndirilməsinə olan maraqdan xəbər verir. İranlı nazir qeyd edib ki, ölkələrimiz arasında ticarət dövriyyəsinin artması müsbət haldır və banklararası əlaqələrin genişləndirilməsi ticarət əlaqələrini daha da genişləndirə bilər. Bundan başqa, ölkələrimiz arasında kənd təsərrüfatı, sənaye, aqrar sahədə avadanlıqların istehsalı, turizm, tranzit və yükdaşımalar sahələrində əməkdaşlıq üçün geniş potensial mövcuddur.

İranın Ərdəbil əyalətinin valisi Məcid Xudabəxş Ərdəbil əyalətinin iqtisadiyyatı, o cümlədən infrastrukturu, kənd təsərrüfatı məhsulları istehsalı və emalı müəssisələri barədə məlumat verib, əməkdaşlıq imkanlarını diqqətə çatdırıb. Ərdəbil valisi vilayətin turizm, kənd təsərrüfatı, xüsusilə əkinçilik və emal sahəsində inkişaf etdiyini vurğulayaraq, bu istiqamətdə Azərbaycanın Ərdəbil vilayəti ilə əlaqələrinin genişləndirilməsinin əhəmiyyətini qeyd edib.

Məqalədə:
Xəbər lenti

Xəbər lenti