Bakı. Trend:
"Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"nin növbəti ictimai müzakirəsi baş tutub. Strateji yol xəritəsi üzrə keçirilən ictimai müzakirələr “Logistika və ticarət” mövsusuna həsr edilib.
Tədbiri giriş sözü ilə açan “Bakı Beynəlxalq Dəniz Ticarət Limanı” QSC-nin Baş direktoru Taleh Ziyadov Azərbaycanın beynəlxalq ticarət və logistika sahəsində böyük potensiala malik olduğunu vurğulayıb. Qeyd olunub ki, Azərbaycan Prezidenti İlham Əliyevin müvafiq Sərəncamı ilə yeni Bakı Limanının (Ələt qəsəbəsi) ərazisi də daxil olmaqla Azad Ticarət Zonasının (ATZ) yaradılması ilə bağlı işlərə start verilib. Cari ilin 10 iyun tarixində müvafiq İşçi Qrupunun ilk iclası keçirilib. İclasda İqtisadiyyat Nazirliyi, Vergilər Nazirliyi, Nəqliyyat Nazirliyi, Ekologiya və Təbii Sərvətlər Nazirliyi, Maliyyə Nazirliyi, Ədliyyə Nazirliyi, Dövlət Gömrük Komitəsi, Əmlak Məsələləri Dövlət Komitəsi, Bakı şəhər İcra Hakimiyyəti, o cümlədən “Azərbaycan Xəzər Dəniz Gəmiçiliyi” QSC və “Azərbaycan Dəmir Yolları” QSC-nin nümayəndələri iştirak ediblər.
Baş direktor vurğulayıbdır: “ATZ özündə logistika sahəsindən əlavə olaraq həmçinin əczaçılıq klasteri, neft təchizatı obyektləri, emaletmə, qablaşdırma və etiketləmə sahələrini birləşdirəcək. Bu bilavasitə Azərbaycan Prezidenti İlham Əliyevin Azərbaycanın qeyri-neft sektorunun inkişafı, ölkəmizin Avrasiya regionunda “hub”, yəni nəqliyyat və logistika mərkəzinə çevirmək siyasətinin mühüm bir hissəsidir”.
Qeyd edək ki, Qaradağ rayonunun Ələt qəsəbəsində yerləşən yeni Bakı Limanı və ATZ çoxşahəli tranzit logistika qovşağı kimi fəaliyyət göstərərək Çin, Hindistan, İran, Türkiyə, Rusiya və Mərkəzi Avrasiya regionu aralarında ticarətin inkişafına və sürətləndirilməsinə töhfə verəcək. Yeni Bakı Limanı (Ələt terminalı)Avropa və Asiyanı birləşdirən geniş beynəlxalq logistika şəbəkəsinin bir hissəsi olmaqla Xəzər dənizi regionunda əsas logistika qovşağı kimi çıxış edəcək, tarixi İpək Yolunun canlanmasına da böyük fayda verəcək.
İqtisadi İslahatların Təhlili və Kommunikasiya Mərkəzinin İcraçı direktoru Vüsal Qasımlı çıxışında bildirib ki, açıq dənizə çıxışı olmayan ölkə olmasına baxmayaraq Azərbaycanın Şərq-Qərb və Şimal-Cənub dəhlizləri üzərində mühüm nəqliyyat-logistika mərkəzinə çevrilməsi təqdirəlayiq haldır: "Azərbaycan ticarət axınları üçün cəlbedici olur, çünki nəqliyyat xərclərində 10 faiz azalma ticarəti 20 faiz çoxaldır. Nəqliyyat-logistika habı olmaqla investisiya axınlarının Azərbaycana yan alması, habelə ölkəmizin qlobal və regional dəyər zəncirlərində fəal iştirakı təmin edilə bilər. Beynəlxalq təcrübə göstərir ki, logistika mərkəzlərində təchizat zəncirinin rəqabətliliyini gücləndirməklə ÜDM-i 3 faiz artırmaq mümkündür. Hazırda Azərbaycan dövlətinin bu sahədə investisiya qoyuluşu üçün aydın strategiyası və hərtərəfli planları var. "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri" sənədində "Logistika və ticarət" 11 prioritet istiqamətdən biri kimi təsbit edilmişdir."
Azərbaycan Respublikası Prezidentinin İqtisadi İslahatlar üzrə Köməkçisi Xidmətinin sektor müdiri Elxan Mikayılov, Maliyyə nazirinin müavini Emin Hüseynov və Dövlət Gömrük Komitəsinin sədr müavini Şahin Bağırov tədbirdə çıxış edərək logistika və ticarət sektorunun ölkə iqtisadiyyatında əhəmiyyətini vurğulamaqla bu sektorun böyük potensiala malik olduğunu qeyd ediblər.
Müzakirələr “Bakı Beynəlxalq Dəniz Ticarət Limanı” QSC-nin Baş direktoru T.Ziyadovun moderatorluğu ilə davam edib. Tədbirdə Bakı Beynəlxalq Dəniz Ticarət Limanının nümayəndələri tərəfindən “Qabaqcıl beynəlxalq təcrübə - Dubay nümunəsi” və “Qabaqcıl beynəlxalq təcrübə - Sinqapur nümunəsi” mövzusunda təqdimatlar keçirilib.
Tədbirdə Azərbaycan Prezidenti Administratiyası, Maliyyə Nazirliyi, Vergilər Nazirliyi, Nəqliyyat Nazirliyi, Dövlət Gömrük Komitəsi, Sərhəd Xidməti, Tranzit Yükdaşımalar üzrə Koordinasiya Şurası, Nəqliyyat Nazirliyi nəzdində Bakı Limanı Kompleksi, Dövlət Neft Şirkəti (SOCAR), Azərbaycan Dəmir Yollari QSC, Azərbaycan Xəzər Dəniz Gəmiçiliyi QSC, Azərbaycan Hava Yolları QSC nümayəndələri, “Azəravtoyol” ASC, Bakı Nəqliyyat Agentliyi, Azərbaycan-Ukrayna Konqresi və "Access Trans", "Panalpina" "Silkway", "DHL" kimi özəl şirkətlərin təmsilçiləri iştirak ediblər.
