...

“Xalq Bank”dan şəxsi konsyerj: Azərbaycanda ilk dəfə olaraq “World Mastercard Black Edition” təqdim edilib

Biznes və iqtisadiyyat xəbərləri Materials 28 Mart 2017 16:01 (UTC +04:00)
“Premium Banking” müştəriləri üçün hazırlanmış yeni “World Mastercard Black Edition” kartını təqdim edilib.
“Xalq Bank”dan şəxsi konsyerj: Azərbaycanda ilk dəfə olaraq “World Mastercard Black Edition” təqdim edilib

Bakı. Trend:

“Xalq Bank” və qlobal ödəniş texnologiyaları təchizatçısı olan “Mastercard” şirkəti xüsusi xidmətlərdən və əlavə imtiyazlardan faydalanmaq istəyən “Premium Banking” müştəriləri üçün hazırlanmış yeni World Mastercard Black Edition kartını təqdim ediblər.

Bankdan Trend-ə verilən məlumata görə, mükəmməl dizaynı və “Mastercard premium” loqotipi ilə seçilən “World Mastercard Black Edition” yeni unikal kartı istifadəçiləri yüksək keyfiyyətli xidmətlər və eksklüziv premium servislə təmin edir.

“World Mastercard Black Edition” kartının sahibləri dünyanın hər yerində unikal imtiyazlardan yararlana bilərlər. Hava limanı zalları üçün ən üstün proqram sayılan “Priority Pass”la “World Mastercard Black Edition” kartının sahibləri dünyanın istənilən aeroportunda 1 000-dən çox VIP-zala keçid hüququ əldə edirlər. Kart sahibləri uçuşdan əvvəl biletin və səyahət növündən asılı olmayaraq rahat gözləmə zallarında vaxtlarını keçirə bilərlər.

Kart istifadəçiləri qlobal olaraq 24 saat fəaliyyət göstərən və səyahət cədvəlin planlanmasında və dəbdəbəli təşkilində əvəzsiz köməkçi alət sayılan “MasterCard Concierge” xidmətindən də yararlana bilərlər. Bu premium konsyerj xidməti kart sahibinə tətil üçün turpaketlərin alınması, uçuşların və hotellərin rezervasiyası, həmçinin avtomobil icarəsində yardım edir və xüsusi təyyarə və ya yaxta ilə səyahətləri təşkil etməkdə köməkçi olur. “MasterCard Concierge” ölkə daxilində və ya xaricdə rok və pop konsertlərindən başlayaraq, opera və baletə, idman yarışları, restoranlarda proqramlara kimi hər növ əyləncə tədbirlərinə yer ayırmaqda geniş təcrübəyə malikdir. Xidmət, həmçinin yerli və ya beynəlxalq səviyyədə ən mükəmməl hədiyyənin tapılmasında da kömək edə bilər. Kart sahibləri etibar edə biləcəkləri xidmətlərin tapılmasında çətinlik çəkdikləri zaman konsyerj onları biznes xidmətlərinə (kuryer və ya katibə), ev xidmətlərinə (çilingər və ya elektrik, dayə, dil kursları, şəxsi məşqçilər) və peşəkar xidmətlərə (həkimlər, hüquqşünaslar, təcili yardım) yönləndirə bilər. Bu xidmət səyahət etdiyiniz ölkənin ən görməli-gəzməli yerləri haqda geniş məlumat verəcək.

Səyahətin məqsədindən asılı olmayaraq “World Mastercard Black Edition” kartının sahibləri dünyanın aparıcı avtomobil icarəsi şirkətlərinin premium klublarına qoşularaq təklif olunan üstünlüklərdən yararlana bilərlər. Kart istifadəçilərinə təqdim olunan imtiyazlar siyahısına xarici ölkəyə səyahət zamanı kart sahibinin və onun ailə üzvlərinin sığortalanması da daxildir.

“World Mastercard Black Edition” kartının istifadəyə verilməsini şərh edən “Xalq Bank”ın İdarə Heyətinin sədrinin müavini Xəzər Bağırlı bildirib: "Mastercard” beynəlxalq ödəniş sistemi ilə “Xalq Bank” arasında olan tərəfdaşlıq hər iki təşkilatın peşəkar komandaları sayəsində möhkəmlənir. Əminəm ki, təqdim olunan “World Mastercard Black Edition” kartı müştərilərimizin ən tələbkar seqmentinin istəklərinə uyğun bir məhsuldur. Sözügedən kartın yaratdığı imkanlar istənilən yerdə – işdə, səyahət və əyləncə zamanı müştərilərimiz üçün əvəzsiz olacaq".

“Mastercard” şirkətinin Azərbaycan üzrə meneceri Alper Meriç bildirib: “World Mastercard Black Edition” kartının buraxılışı yüksək keyfiyyətli premium bankçılıq xidmətləri istiqamətində atılmış əhəmiyyətli bir addımdır. Yeni kart məşğul həyat tərzi keçirən istifadəçilərin ehtiyaclarını ödəyən nüfuzlu bir maliyyə alətidir. Əminəm ki, kart sahibləri yeni məhsulun eksklüziv dizaynı və unikal xüsusiyyətlərini layiqincə qiymətləndirəcəklər. Mən “Xalq Bank”ı xüsusi imkan və üstünlükləri özündə birləşdirən yeni kartın buraxılışı münasibətilə təbrik edirəm".

Qeyd edək ki, “Xalq Bank” Azərbaycanda “World Mastercard Black Edition” kartını istifadəyə verən ilk bankdır.

Məqalədə:
Xəbər lenti

Xəbər lenti