Dövlət Gömrük Komitəsi (DGK), Azərbaycanın Beynəlxalq Bankı (ABB)və Azericard Ltd prosessinq şirkəti gömrük ödəmələrinin avtomatlaşdırılmasını (ödəmə kartlarına keçirilməsi) üzrə pilot layihəsini demək olar ki, başa çatdırıblar. Azericard Ltd -dən Trend ə verilən məlumata görə, Bakı gömrük məntəqəsində və Sulutəpə qəsəbəsindəki avtomobil gömrük postunda ödəmələrin həyata keçirildiyi 2 POS-terminal quraşdırılıb.
"Hazırda DGK pilot layihəsində iştirak etmək üçün yeniləşdirilməli olan kartların sahiblərinin siyahısını hazırlamaqla məşğuldur ", -deyə şirkətdən bildiriblər.
Bankın və şirkətin xidmətlərinə görə ödəmə sxemi payızda DGK-nin sədri Kəmaləddin Heydərov və ABB-nın İdarə Heyətinin sədri Cahangir Hacıyev səviyyəsində həll ediləcək və bundan sonra müvafiq müqavilə imzalanacaq.
Layihə üzrə işlər "Azərbaycanda antiinflyasiya tədbirlərinin gücləndirilməsi barədə " ölkə prezidenti İlham Əliyevin 31 may tarixli fərmanından sonra sürətlənib. Gömrük sahəsində ödəmələrin avtomatlaşdırılmış sistemlərinə keçid hələ 2003-cü ilin sonlarında planlaşdırılıb. O zaman DGK, ABB və Azericard Ltd bankların gömrük ödəmələri, onların həcmi və bank xidmətlərinin bölüşdürülməsi barədə razılığa gələ bilməmişdilər.