BÜTÜN NÖV NOMİNALDA ƏSKİNAS VƏ SİKKƏLƏRİN DİZAYNI HAZIRDIR

Denominasiya edilmiş Azərbaycan manatının bütün növ nominalda əskinas və sikkələrinin dizaynının işlənməsi prosesi başa çatıb. Azərbaycan Milli Bankının mətbuat katibi Kamran Nəzirlinin Trend ə bildirdiyinə görə, hazırda yeni manatın 6 növ əskinas və sikkələrinin dizaynı hazırdır.

Dizaynın eskizləri Azərbaycan prezidentinə təqdim olunub. Onların dizaynı "vahid ailə "yaratmağa imkan verəcək.

4 il müddətinə istifadə üçün 250 mln yeni nümunəli banknot və 155 mln sikkə sifariş etmək nəzərdə tutulur.

100,50,20,10,5 və 1 nominalda banknotlar və 1,3,5,10,20 və 50 qəpiklik sikkələr buraxmaq planlaşdırılır. 50 qəpiklik sikkə bimetallik, yəni ağ və sarı rənglərdə olacaq.

Milli bank artıq Avstriyanın Osterreicheichische Banknoten und Sicherheitsduck şirkətləri ilə denominasiya edilmiş yeni əskinas və sikkələrin çapı və kəsilməsi haqqında müqavilə bağlayıb. Müqavilənin dəyəri 16 mln avrodur.

Milli Bank qiymətlərin yeni miqyasda göstərilmə qaydalarını açıqlayıb.

Məlumata əsasən, 2005-ci i oktyabrın 1-dən bütün qiymətlər həm köhnə, həm də yeni miqyasda göstəriləcək. Onların hesablanması zamanı bütöv rəqəmlər alına bilməz.

0,5 qəpikdən aşağı rəqəm alındıqda qiymət azalmaya doğru yuvarlaşdırılacaq (53,4 qəpik 53 qəpik olacaq), 0,5-ə bərabər və ya ondan artıq rəqəm yarandıqda isə o, qiymətlərin artması əsas götürülərək yuvarlaqlaşdırılacaq (53,6 qəpik 54 qəpik olacaq)

Vergüldən (",") istifadə edildikdə qiymətlər manat və qəpiklə göstərilir, mindən istifadə edildikdə isə nöqtədən (".") istifadə olunur. Beləliklə, 10,50 manat on manat 50 qəpik, 25.500 manat isə iyirmi beş min 500 yüz manatdır.