Azərbaycan, Bakı, 24 noyabr /Trend, müxbir Maksim Tsurkov/
2014-cü ilin yanvar-oktyabr aylarında Gürcüstan Azərbaycandan neft ekvivalenti ilə 222,48 milyon dollar məbləğində 1065,9 min ton təbii qaz idxal edib. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
Azərbaycan Gürcüstana yanacağın bu növünü tədarük edən əsas ölkədir. Gürcüstana bu kateqoriyadan idxalın ümumi həcminin 82,2 faizini Azərbaycanın təbii qazı təşkil edir.
Hesabatda qeyd edilir ki, ilin əvvəlindən Gürcüstana ümumilikdə 270,68 milyon dollar məbləğində təbii qaz idxal edilib. Tədarüklərin qalan hissəsi Rusiya və digər mənbələrin payına düşüb.
İllik hesablamada Azərbaycandan Gürcüstana təbii qazın idxalında dəyərlə ifadədə 18,2 faiz artım (kəmiyyətlə ifadədə tədarüklər 151,76 min ton neft ekvivalenti və ya 14,2 faiz) olub.
Müqayisə üçün: keçən ilin ilk 9 ayında Azərbaycandan Gürcüstana neft ekvivalenti ilə 188,21 milyon dollar dəyərində 914,15 min ton təbii qaz idxal olunmuşdu.
Hesabat dövründə Azərbaycandan Gürcüstana idxalın ümumi həcmində qazın xüsusi çəkisi 43,7 faiz olub.
2014-cü ilin yanvar-oktyabr aylarında Gürcüstan Azərbaycandan 509,36 milyon dollar dəyərində məhsul idxal edib. Hesabata əsasən, Azərbaycandan Gürcüstana idxalın həcmi il ərzində 3,9 faiz artıb. Müqayisə üçün: ötən ilin analoji dövründə Gürcüstan Azərbaycandan 490,27 milyon dollar dəyərində məhsul idxal edib.