Azərbaycan Beynəlxalq Əməliyyat Şirkəti (ABƏŞ) dünən Bakı-Supsa boru kəmərinin ("qərb" marşrutu) işini dayandırıb. Bu barədə Trend ə ABƏŞ-dən bildirilib.
Boru kəmərinin işinin planlı qaydada dayandırılması zamanı bir sıra avadanlıqlar yeniləri ilə əvəz olunacaq. Bu il iş planlı qaydada ilk dəfə olaraq dayandırılır.
Avqustun 1-də ABƏŞ "Azəri-Çıraq-Günəşli" yatağından neftin daxil olduğu Gürcüstanın Supsa terminalının da işini dayandırıb.
Əsas məqsəd isə neftin Supsa terminalından dəniz məntəqəsinə qədər çatdırıldığı şlanqın dəyişdirilməsi idi.
ABƏŞ obyektlərin işinin dayandırılması zamanı "Azəri-Çıraq-Günəşli" yatağından Azeri Light neftinin hasilatını davam etdirmək fikrindədir.
ABƏŞ-in Supsa terminalında 1 mln barel, Səngəçal terminalında isə 4 mln barelə qədər neft saxlamaq imkanı var.