"Gürcüstanda sabahkı təntənəli mərasim Bakı-Tbilisi-Ceyhan (BTC) boru kəməri layihəsində yeni mərhələdir", - deyə oktyabrın 11-də ARDNŞ-in rəhbəri və BTC Co-nun baş direktoru Natiq Əliyev bəyan edib.
Onun sözlərinə görə, boru kəmərindəki texniki neft artıq Gürcüstandakı nasos stansiyasına çatıb və bundan sonra neft ikinci stansiya (PSG-2) istiqamətində hərəkət edəcək. "Oktyabrın sonlarında neft boru kəmərinin Gürcüstan hissəsini dolduracaq və Türkiyənin sərhəddini keçəcək", - deyə o bildirib.
N.Əliyevin proqnozlarına görə, Azərbaycan nefti Türkiyənin Ceyhan limanına bu il dekabrın sonlarında çatacaq.
Qeyd edək ki, bu gün neft kəmərinə zəruri olan neftin 29% -i vurulub. Bakı-Ceyhana 396,5 min ton Azeri Light növlü neft vurulub ki, bu da 2,9 milyon barel xammal təşkil edir. Neft kəmərinin tam dolması üçün 10 milyon barel neft lazımdır.