Dövlət Neft Şirkəti (ARDNŞ) və ExxonMobil bu Amerika şirkətinin operatoru olduğu "Naxçıvan" və "Zəfər-Məşəl" perspektiv strukturlarında ikinci kəşfiyyat quyusunun qazılmasından imtina ilə bağlı kompensasiyanın ödənilməsi barədə razılığa gəliblər. Bu barədə Trend ə ARDNŞ-in rəsmi nümayəndəsi məlumat verib.
Onun sözlərinə görə, "Zəfər-Məşəl" strukturunda ikinci kəşfiyyat quyusunun qazılmasından imtina edilməsinə görə Azərbaycan Dövlət Neft Şirkətinə $32 mln, "Naxçıvan"dakı analoji işlərlə bağlı imtinaya görə $18 mln vəsait ödəniləcək.
ExxonMobil "Zəfər-Məşəl"də birinci kəşfiyyat quyusunda qazma işlərinin 2004-cü ildə başa çatdırıb. Qazma işlərinin nəticələri üzrə cəlbedici karbohidrogen ehtiyatları əldə edilməyib. Birinci kəşfiyyat quyusunda 11 ay davam edən qazma işləri üzrə xərclər $110 mln-dan artıqdır.
"Naxçıvan"dakı (NAKX-1) ilk quyuda "İstiqlal" qurğusu ilə 2001-ci ilin 22 avqustundan başlanan qazma işləri 2002-ci ilin fevralında dayandırılıb. Əvvəlcə quyunun layihə dərinliyi 6444 metr, yekun qazma işləri 6746 metr təşkil edib. Qazma işlərinin yekunları üzrə ExxonMobil də cəlbedici karbohidrogen ehtiyatları aşkar edilməyib.