Oktyabrda Bakı Telefon Rabitasi (BTRİB) İstehsalat Birliyi abonentlərə CDMA (Code Division Multiple Access) xidmətlərini təqdim edəcək. İB-dən Trend ə verilən məlumata görə, 10 gün ərzində tədbirlərə başlanılacaq və hazırlanmış layihəyə müvafiq olaraq proqramlaşdırma üzrə işlər həyata keçiriləcək.
İB-dən həmçinin bildiriblər ki, layihənin icraçısı Çinin Huawei Technologies şirkətidir. "Bu texnologiyanın tətbiqindən sonra xidmətlər 564/565 indeksi altında həyata keçiriləcək"-deyə İB-dən bildiriblər.
Yuxarıda göstərilən texnologiyanın təmin edilməsi məqsədilə layihəyə müvafiq olaraq teleqüllədə, eləcə də 438, 477 və 453/455 saylı EATS-də CDMA ötürücüləri quraşdırılacaq.
CDMA-dan birinci növbədə paytaxt və Abşeron yarımadasındakı abonentlər istifadə edə biləcəklər.
CDMA (Code Division Multiple Access - Kod yarımbölmələri olan çoxsaylı daxil olma sistemi) - rəqəmsal simsiz texnologiyadır. CDMA nitqi rəqəmsal informasiyaya konversiya edir ki, o sonradan radiosiqnal kimi simsiz şəbəkəyə göndərilir. Kommersiya məhsulu kimi ilk dəfə 1995-ci ildə meydana çıxan dünyada ən tez yayılan simsiz texnologiyadan biridir. 1999-cu ildə Beynəlxalq Telekommunikasiya İttifaqı (International Telecommunications Union) CDMA-nı "3-cü nəsil" (3G) yeni sismsiz texnologiyalar sistemi üçün sənaye standartı kimi seçib.