Azərbaycan, Bakı, 1 oktyabr /Trend, müxbir İlahə Məmmədli/
2014-cü ilin yanvar-avqust aylarında Azərbaycan dövlət büdcəsinin mədaxil hissəsinə faktiki daxilolmalar ötən ilin müvafiq dövrü ilə müqayisədə 3,7 faiz azalaraq 12,407 milyard manat (ÜDM-in 31,7 faizi) təşkil edib. Bunu çərşənbə günü Trend-ə hökumətdən deyiblər.
Dövlət büdcəsinin xərcləri isə 1,3 faiz azalaraq 11,469 milyard manat (ÜDM-in 29,3 faizi) olub. Hesabat dövründə büdcənin profisiti 938,4 milyon manat və ya ÜDM-in 2,4 faizini təşkil edib ki, bu da ötən ilin müvafiq dövrünün göstəricisindən 25,9 faiz azdır.
Daxilolmalar strukturunda 39 faiz (4,845 milyard manat) Vergilər Nazirliyinin hesabına təmin edilib. Gömrük rüsumları və vergilərindən daxilolmalar 1001,4 milyon manat (8,1 faiz xüsusi çəki ilə), digər mənbələr hesabına isə 6,561 milyard manat (52,9 faiz) təşkil edib.
Qeyd edilən dövrdə vergi yığımları ötən ilin analoji dövrünə nisbətən 8 faiz, gömrük ödənişləri 12,8 faiz artıb, digər mənbələrdən daxilolmalar isə 12,7 faiz azalıb.
Yanvar-avqust aylarında əlavə dəyər vergisindən (ƏDV) dövlət büdcəsinə 1,998 milyard manat və ya ümumi gəlirlərin 16,1 faizi daxil olub. Mənfəət vergisi üzrə daxilolmalar 1,644 milyard manat (13,3 faiz), gəlir vergisi üzrə 624,7 milyon manat (5 faiz), aksiz vergisi üzrə 555,4 milyon manat (4,5 faiz), əmlak vergisi üzrə 92,1 milyon manat (0,7 faiz), torpaq vergisi üzrə 26,7 milyon manat (0,2 faiz), yeraltı sərvətlər vergisi üzrə 84,7 milyon manat (0,7 faiz), xarici iqtisadi fəaliyyət vergisi üzrə daxilolmalar isə 496,9 milyon manat (4 faiz) təşkil edib.
Hesabat dövründə büdcə vəsaitlərindən əhalinin sosial təminatı və müdafiəsinə 1,290 milyard manat (11,2 faiz xüsusi çəki ilə), təhsilə 873,2 milyon manat (7,6 faiz), səhiyyəyə 401,6 milyon manat (3,5 faiz), prokurorluq, təhlükəsizlik, hüquq-mühafizə və məhkəmə orqanlarının saxlanılmasına 655 milyon manat (5,7 faiz), iqtisadiyyata investisiya qoyuluşlarına isə 5030,5 milyon manat (43,9 faiz) xərclənib.
Dövlət büdcəsi xərclərinin 21,9 faizi (2489,8 milyon manat) əhalinin əməkhaqqı, pensiya və müavinətlərinin ödənilməsinə xərclənib.
2014-cü il dövlət büdcəsinin gəlirləri 18,384 milyard manat, xərcləri isə 20,063 milyard manat səviyyəsində nəzərdə tutulur.