Azərbaycan, Bakı, 20 noyabr / Trend , müxbir Ü.İsmaylova/
Dünya Bankının Geodeziya və Kadastr komponenti üzrə "Daşınmaz əmlakın qeydiyyatı" layihəsi çərçivəsində, Azərbaycan Dövlət Torpaq və Xəritəçəkmə Komitəsi tərəfindən keçirilən Beynəlxalq tenderin qalibi İsveçrənin "LEİCA" şirkəti olub. Bu barədə cümə günü Dövlət Komitəsindən bildirilib.
"Şirkət nümayəndələrinin Azərbaycan Dövlət Torpaq və Xəritəçəkmə Komitəsindəki görüşündə bu ilin sonunadək geodeziya üçün peyk şəbəkəsinin qurulmasına dair müqavilənin hazırlanması haqqında qərar qəbul ediblər", - məlumatda deyilir.
Tərəflər şəbəkənin qurulmasına dair müvafiq işlərin 2010-cu il ərzində aparılacağı və bir il müddətində sınaq fəaliyyətindən sonra daimi istifadəyə veriləcəyinə dair razılığa gəliblər.
Peyk Geodeziya Şəbəkəsi tam istifadəyə verildikdən sonra həmin şəbəkənin idarə edilməsi Dövlət Torpaq və Xəritəçəkmə Komitəsinin mütəxəssisləri tərəfindən həyata keçiriləcəkdir.
Azərbaycan höküməti və Dünya Bankı 2007-ci ilin iyununda daşınmaz əmlakın vahid kadastr sisteminin həyata yaradılması haqqında müqavilə imzalayıblar. Layihə dörd kompanentdən ibarətdir - daşınmaz əmlakın qeydiyyatı; dövlət əmlakının idarəedilməsi və reystri; xəritəçəkmə bazası və torpaq kodastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 milyon dollar təşkil edir və DB-nin payına 30 milyon dollar düşür. Kredit resursları beş il ərzində güzəştlə 20 il müddətinə verilir.
Layihə çərçivəsində ölkə ərazisində daimi fəaliyyət göstərən 37 Peyk Geodeziya stansiyasından ibarət olan xüsusi şəbəkənin qurulması planlaşdırılır. Peyk Geodeziya stansiyaları xüsusi yerlərdə hərəsi bir-birindən 75 km-dən uzaq olmamaq şərti ilə qurulacaq. Şəbəkənin idarəetmə sistemi Dövlət Torpaq və Xəritəçəkmə Komitəsinin Dövlət Aerogeodeziya Müəssisəsində yerləşəcək. Həmin şəbəkənin köməyi ilə Azərbaycanda istənilən nöqtənin, obyektin və s. koordinatların 2-3 sm dəqiqliklə müəyyən edilməsi mümkündür. Peyk Geodeziya şəbəkəsi demək olar ki, iqtisadiyyatın bütün sahələrinə xidmət edəcəkdir və MDB məkanında bu ilk belə bir şəbəkədir. Analoji şəbəkə Türkiyə ərazisində cəmi 2 ildir fəaliyyət göstərir və hal-hazırda şəbəkədən 600-dən çox təşkilat istifadə edir.
Məqalə müəllifi ilə əlaqə ünvanı: [email protected]
