Azərbaycan, Bakı, 21 fevral /Trend, müxbir E.Mehdiyev/
Strasburqda Xocalı soyqırımının 20-ci ildönümü münasibətilə mitinq keçiriləcək.
Diasporla İş üzrə Dövlət Komitəsindən çərşənbə axşamı Trend-ə verilən məlumata görə, fevralın 25-də Fransanın Strasburq şəhərinin Kleber meydanında Strasburq "Azərbaycan Evi" və Azərbaycanlıların və digər Türkdilli Xalqların Əməkdaşlıq Mərkəzinin (ATXƏM) təşkilatçılığı ilə "Xocalıya Ədalət" beynəlxalq kampaniyası çərçivəsində mitinq keçiriləcək.
Strasburq "Azərbaycan Evi"nin rəhbəri Mustafa Alıncanın verdiyi məlumata görə, mitinqin keçirilməsi üçün Strasburq şəhər prefekturasının və polis idarəsinin razılığı alınıb.
Saat 14:00-dan 16:00-dək davam edəcək mitinq zamanı Kleber meydanında fransız, ingilis dillərində kitablar və Xocalı soyqırımına həsr olunmuş fotoşəkillərdən ibarət sərgi təşkil olunacaq, havaya Xocalı şəhidlərinin xatirəsinə 613 şar uçurulacaq.
Xatırladaq ki, 1992-ci il fevralın 26-da Ermənistan silahlı birləşmələrinin Xocalı şəhərinin yeddi minlik əhalisinə qarşı törətdiyi soyqırım aktı zamanı 613 soydaşımız, o cümlədən 106 qadın, 63 uşaq və 70 qoca xüsusi qəddarlıqla qətlə yetirilib, meyitlər üzərində təhqiredici hərəkətlərə yol verilib.